ऊर्जा खबर
काठमाडौं । भारतको १७ अर्ब रुपैयाँ लगानीमा दुई पेट्रोलियम पाइपलाइन र एउटा टर्मिनल बनाइदिने भएकाे छ । प्रधानमन्त्री पुष्पकमल दाहालको भारत भ्रमणका क्रममा सिलिगुडी-झापा र अमलेखगन्ज-लोथर पाइपलाइन र टर्मिनल बनाउने समझदारी भएको हो ।
दाहाल र भारतीय समकक्षी नरेन्द्र मोदीको उपस्थितिमा उद्योग वाणिज्य तथा आपूर्तिमन्त्री रमेश रिजाल र भारतीय पेट्रोलियम मन्त्री हरदीप सिंह पुरीले समझदारीपत्र आदानप्रदान गरे । नेपाल आयल निगमका कार्यकारी निर्देशक उमेशप्रसाद थानीका अनुसार समझदारी पत्रमा भारतको सिलिगुडीदेखि नेपालको झापासम्म पेट्रोलियम पाइपलाइन र टर्मिनल निर्माण हुनेछ ।
त्यस्तै, मोतिहारी–अमलेखगन्जसम्म रहेको हालको पेट्रोलियम पाइपलाइनलाई चितवनको लोथरसम्म विस्तार गर्ने समझदारी भएको उनले बताए । ‘समझदारीपत्र अनुसार अबको ६ महिनाभित्र सबै गृहकार्य गर्नुपर्छ र निर्माणको काम थालेको ५४ महिनामा तीनवटै परियोजना सम्पन्न गर्नुपर्छ’, उनले भने, । ‘यी तीन वटै आयोजना भारतले बनाइदिने हो ।’
२०२० को डिसेम्बरमा भारतीय आयल कर्पोरेसन र नेपाल आयल निगमको संयुक्त टोलीले गरेको अध्ययन अनुसार दुई वटा पाइपलाइन र एउटा टर्मिनल बनाउन लागत १७ अर्ब लाग्ने निष्कर्ष निकालेको थियो ।
.jpg)