ऊर्जा खबर
काठमाडौँ । नेपाल हाइड्रोपावर एकेडेमीको अध्यक्षमा मिथुन चक्रवर्ति प्रसाद पौडेल नियुक्त भएका छन् । उनी स्वतन्त्र ऊर्जा उत्पादकहरूको संस्था, नेपाल (इपान) का सदस्य हुन् ।
संस्थाको माघ २ गते सम्पन्न चौथो वार्षिक साधारण सभाले पौडेलको अध्यक्षमा ५ सदस्य सञ्चालक समिति चयन गरेको हो । समितिका सदस्यहरूमा विश्वेश्वरप्रसाद ढकाल, शङ्कर बस्याल, गोपाल न्युरे र सञ्जीव न्यौपाने रहेका छन् । समितिको पदावधि ३ वर्षको हुने छ ।
धादिङको धुनिवेशी नगरपालिका–५ मा कार्यालय रहेको एकेडेमी मुनाफा वितरण नगर्ने गैर–सरकारी व्यावसायिक तालिम केन्द्र हो । यसको स्थापना सन् २०२२ मा भएको हो । एकेडेमीले जलविद्युत् आयोजनाहरूको सञ्चालन तथा मर्मतसम्भारमा केन्द्रित छोटो अवधिका (२ हप्ता देखि ३ महिना सम्मका) तालिम प्रदान गर्दै आएको छ ।
यहाँ युरोपबाट ल्याइएका उन्नत सामग्रीसहित अत्याधुनिक जलविद्युत् कार्यशाला सञ्चालनमा रहेको संस्थाले जनाएको छ ।
