विद्युत उत्पादन र व्यापारमा चुनौतीको सामना गर्दै संगठित र संस्थागत हुँदै जानु सन्तोषको विषय हो-राष्ट्रपति भण्डारी

काठमाडौं । राष्ट्रपति विद्यादेवी भण्डारीले हाम्रो देशमा विद्युत उत्पादन र व्यापारका क्षेत्रमा विद्यमान चुनौतीको सामना गर्दै ऊर्जा व्यवसायीहरु संगठित र संस्थागत हुँदै जानु सन्तोषको विषय रहेको बताएकी छन् । आज (शनिबार) देखि भृकुटीमण्डपमा सुरु भएको ’हिमालयन हाइड्रो एक्स्पो २०२२’ उद्घाटन गर्दै उनले यस्तो बताएकी हुन् ।

‘हाम्रो मुलुक अथाह जलसम्पदाले सम्पन्न छ, विद्युतको आन्तरिक खपत गरी निर्यात गर्ने क्षमता समेत हामी राख्दछौं’, उनले भनीन, ‘विद्युत उत्पादन, खपत र निर्यात व्यवस्थापनलाई प्रभावकारी बनाउँदै अर्थतन्त्रमा ऊर्जा क्षेत्रको योगदान वृद्धि गरी समृद्ध नेपाल सुखी नेपालीको राष्ट्रिय संकल्प पूरा गर्नु हाम्रो प्राथमिकता हो ।’

ऊर्जा विकासमा निजी क्षेत्रको महत्वपूर्ण योगदान रहको बताउँदै भण्डारले साना र मझौंला जलविद्युत आयोजनामा लगानी गरेर उज्यालो गाउँ बनाउने अभियानलाई तीब्रता दिन समेत निजी क्षेत्रलाई आग्रह गरिन् ।

हाम्रो राष्ट्रिय ऊर्जा आवश्यक्ता पूरा गर्ने उद्देश्य राखेर जलविद्युत विकासका लागि योजनावद्ध प्रयास हुन थालेकोसमेत आधा शताब्दी भइसकेको बताउँदै उनले भनिन्, ‘यी प्रयासहरु भएतापनि जनताको ठूलो संख्याले अझै बिजुली बाल्न पाएका छैनन् भने हाम्रा उद्योगहरुले आजपनि माग अनुसार विजुली प्राप्त गर्न सकिरहेका छैनन् ।’