ऊर्जा खबर
काठमाडौँ । गत असोज ११ गतेको अविरल वर्षासँगै आएको बाढीपहिरो र कालीगण्डकी नदीको कटानका कारण क्षतिग्रस्त कालीगण्डकी करिडोर २२० केभी डबल सर्किट प्रसारण लाइनअन्तर्गतको म्याग्दी दाना–राहुघाट खण्ड २१ दिनपछि पुनः सञ्चालनमा आएको छ ।
नेपाल विद्युत् प्राधिकरणले आपत्कालीन पुनःस्थापना प्रणाली (इआरएस) टावर प्रयोग गरी उक्त खण्ड सञ्चालनमा ल्याएको हो । शनिबार राति सवा १० बजे प्रसारण लाइनको २२० केभीको एउटा सर्किट चार्ज गरी अस्थायी रुपमा सञ्चालनमा ल्याइएको जनाइएको छ ।
बाढीले म्याग्दीको अन्नपूर्ण गाउँपालिका–६, पोखरेबगरस्थित प्रसारण लाइनका चार टावरमा क्षति पुर्याएको थियो । ती मध्ये टावर नम्बर २१, २३ र २४ पूर्णतः क्षतिग्रस्त थिए भने २२ नम्बरमा आंशिक क्षति पुगेको थियो ।
प्रसारण लाइन अवरुद्ध भएपछि दाना सबस्टेसनमार्फत राष्ट्रिय प्रसारण प्रणालीमा जोडिएका निजी क्षेत्रका पाँच जलविद्युत् आयोजनाबाट उत्पादित कुल १७० मेगावाट विद्युत् राष्ट्रिय प्रणालीमा प्रवाह हुन सकेको थिएन । अब त्यो समस्या समाधान भएको छ ।
कर्मचारीको अहोरात्र खटाइ निजी क्षेत्रसँगको सहकार्यमा इआरएस टावर प्रयोग गरी प्रसारण लाइन सञ्चालनमा ल्याउन सफलता मिलेको प्राधिकरणका कार्यकारी निर्देशक दीर्घायुकुमार श्रेष्ठले बताए । भौगोलिकरूपमा अत्यन्त जटिल र दुर्गम स्थानमा इआरएस टावर जडान गर्नु चुनौतीपूर्ण भए पनि निरन्तरको प्रयासले काम सम्पन्न भएको उनको भनाइ छ ।
प्राधिकरण पोखरा ग्रिड महाशाखाका प्रमुख रोशन खड्काका अनुसार इआरएस टावरमार्फत प्रसारण लाइन सञ्चालनमा ल्याइएपछि बाढीले क्षति पुर्याएका टावरको स्थायी पुनर्निर्माण प्रक्रिया अगाडि बढाइएको छ । स्थायी टावर निर्माण सम्पन्न भएपछि प्रसारण लाइनको दाना–राहुघाट खण्ड नियमित अवस्थामा सञ्चालनमा आउने छ ।
कालीगण्डकी र यसका सहायक नदीमा निर्माण हुने जलविद्युत् आयोजनाबाट उत्पादित विद्युत् एकत्रित गरी राष्ट्रिय प्रणालीमा प्रवाह गर्ने उद्देश्यले कालीगण्डकी करिडोर निर्माण गरिएको हो । म्याग्दीको अन्नपूर्ण गाउँपालिका–३ स्थित दाना सबस्टेसनबाट सुरु भई पर्वत, बागलुङ, स्याङ्जा, पाल्पा र रुपन्देही हुँदै नवलपरासी (बर्दघाट सुस्ता पश्चिम) को सुनवल नगरपालिका–१३ स्थित नयाँ बुटवल सबस्टेसनसम्मको यसको लम्बाइ करिब १३० किलोमिटर छ; जसले करिब १२०० मेगावाट विद्युत् प्रवाह गर्न सक्ने छ ।
