चार उद्योगले तिरे बक्यौता महसुलको पहिलो किस्ता, काटिएको विद्युत् लाइन जोडियो

काठमाडौँ । रुपन्देहीमा सञ्चालित चार उद्योगले डेडिकेटेड फिडर तथा ट्रंक लाइनबाट विद्युत् उपभोग गरेबापत बक्यौता रहेको प्रिमियम महसुलको पहिलो किस्ता बुझाएका छन् । भैरहवा क्षेत्रमा सञ्चालित पञ्चकन्या प्लाष्टिक उद्योग, पञ्चकन्या स्टील इण्डष्ट्रिज, सिद्धार्थ पेटप्लान्ट र श्याम प्लास्टिकले सोमबार प्रिमियम महसुल बक्यौताको पहिलो किस्ता बुझाएको नेपाल विद्युत् प्राधिकरणले जनाएको छ । 

पहिलो किस्ता तिरेपछि उद्योगमा काटिएको विद्युत् लाइन झण्डै डेढ सातापछि जोडिएको प्राधिकरणका कार्यकारी निर्देशक मनोज सिलवालले जानकारी दिए । उनका अनुसार उद्योगहरूले २०७२ माघदेखि २०७५ वैशाखसम्ममा डेडिकेटेड तथा ट्रंक लाइन प्रयोग बापतको प्रिमियम महसुलको पहिलो किस्ता बुझाएका हुन् ।

प्राधिरणका अनुसार पञ्चकन्या प्लाष्टिकको २४ लाख ६३ हजार, पञ्जकन्या स्टीलको ५२ लाख १९ हजार, सिद्धार्थ पेटप्लान्टको  १ करोड ८३ लाख र श्याम प्लास्टिकको ४९ लाख १० हजार रुपैयाँ बक्यौता रहेको छ । 

बक्यौतालाई २८ किस्तामा विभाजन गरी उद्योगहरुले पहिलो किस्ता तिरेका हुन् ।