ऊर्जा खबर
काठमाडौं । आशुतोष इनर्जी लिमिटेडले २ मेगावाटको चेपे खोला क्यासकेड जलविद्युत् आयोजना निर्माण गर्ने भएको छ । यसका लागि तयारी अघि बढाइएको कम्पनीका अध्यक्ष मोहन बिक्रम कार्कीले जानकारी दिए ।
कम्पनीको छैंठौं वार्षिक साधारणसभामा उनले ८.६३ मेगावाटको चेपे खोला जलविद्युत् आयोजनाको क्यासकेड आयोजनाका रूपमा उक्त २ मेगावाटको परियोजना निर्माण गर्न लागेको बताएका हुन् ।
‘डाइनामिक हाइड्रो लिमिटेडले अघि बढाएको उक्त आयोजना आशुतोषले खरिद गरी निर्माण गर्न लागेको छ,’ उनले भने, ‘अहिले यो आयोजनाको वातावरणीय प्रभाव मूल्यांकन प्रतिवेदन तयारी गर्ने काम भइरहेको छ ।’
आयोजनाका लागि लगानी जुटाउन सेयर निष्कासन गर्ने तयारी गरिरहेको पनि कम्पनीले जनाएको छ । साथै, सेयरधनीबाट माग हुने थप पुँजी र बाँकी बैंकबाट ऋण लिई आयोजनाको निर्माण अघि बढाइने छ ।
पहिलो चरणमा सर्वसाधारणका लागि १२ करोड रुपैयाँ बराबरको सेयर निष्कासन गर्ने तयारी गरेको कम्पनीका प्रमुख कार्यकारी अधिकृत दिनेशकुमार बर्तौलाले बताए । उनका अनुसार चालु आर्थिक वर्षभित्र सेयर निष्कासन गर्ने योजना छ ।
कम्पनीले निर्माण गरेको ८.६३ मेगावाटको चेपे खोलाले २०७९ असोज ६ गतेदेखि व्यवसायिक विद्युत् उत्पादन गरिरहेको छ । उत्पादित विद्युत् नेपाल विद्युत् प्राधिकरणको मध्य मर्स्याङ्दी जलविद्युत् केन्द्रको स्वीचयार्डमार्फत वैकल्पिक रुपमा राष्ट्रिय ग्रिडमा जोडिएको छ । यसअघि यसबाट उत्पादित विद्युत् किर्तिपुर सबस्टेसन हुँदै प्रणालीमा प्रवाह गर्ने योजना थियो । विविध कारणले यो लाइन पूरा नभएपछि मध्य मर्स्याङ्दीको स्वीचयार्ड हुँदै ग्रिडमा जोडिएको हो ।
प्राधिकरणको वैकल्पिक व्यवस्था कै कारण आयोजनाको विद्युत् समयमा जोडिन नपाउँदा आर्थिक वर्ष (आव) २०७९/८० मा ५ करोड ७५ लाख रुपैयाँ नोक्सान बेहोर्नु परेको कार्कीले बताए । साथै, आव २०८०/८१ को पहिलो त्रैमासमा मात्र कम्पनीले ५ करोड १२ लाख रुपैयाँ नोक्सानी बेहोरेको कम्पनीले जनाएको छ ।
यो अवधिमा कम्पनीले ६ करोड ५७ लाख ८६ हजार रुपैयाँ बराबरको विद्युत् उत्पादन गरी बिक्री गरेको छ, यो कुल कन्ट्रयाक्ट इनर्जीको ५६.२० प्रतिशत मात्र रहेको कम्पनीले जनाएको छ ।
चेपे खोलाको काम १ अर्ब ४९ करोड ८८ लाख ६९ हजार रुपैयाँ लागतमा सम्पन्न भएको हो । जसअनुसार प्रतिमेगावाट लागत १७ करोड ३६ लाख ८१ हजार रुपैयाँ रहेको छ ।
७.५ प्रतिशत बोनस सेयर पारित
कम्पनीको शुक्रबार सम्पन्न साधारणसभाले आव २०७९÷८० को मुनाफाबाट ३ करोड रुपैयाँ अर्थात् चुक्ता पुँजीको ७.५ प्रतिशत बोनस सेयर वितरण गर्ने प्रस्ताव पारित गरेको छ ।
