ऊर्जा खबर
काठमाडौं । नेपाल विद्युत प्राधिकरणका ३ निर्देशकसहित ५० कर्मचारीहरूले आगामी भदाै र असाेजभित्र अनिवार्य अवकास पाउने भएका छन् । उमेर, हद, सेवा अवधि पुगेका र शैक्षिक प्रमाणपत्रका आधारमा १ देखि ११ तहसम्मका कर्मचारीले अवकास पाउन लागेको प्राधिकरणले जनाएको छ । प्राधिकरणका अनुसार भदौमा २४ र असोजमा २६ कर्मचारीले सेवाबाट अवकास पाउँदै छन् ।
भदौमा मात्र ३ जना निर्देशकले शैक्षिक प्रमाणपत्रका आधारमा अनिवार्य अवकास पाउन लागेको प्राधिकरणले जनाएको छ । आन्तरिक लेखा परिक्षण विभागमा कार्यरत ओम प्रकाश भट्ट, वातावरण तथा सामाजिक अध्ययन विभागमा कार्यरत रविन्द्रप्रसाद चौधरी र प्राधिकरण सहायक कम्पनी अनुगमन निर्देशनालयमा कार्यरत तारानाथ शर्माले अनिवार्य अवकास पाउँदै छन् ।
यस्तै, तह १० का विश्वनाथ शर्माले पनि शैक्षिक प्रमाणपत्रका आधारमा अवकास पाउँदै छन् । तह ७ का २, तह ६ का ३, तह ५ का ३, तह ३ का ४, तह २ का ६ र तह १ का २ कर्मचारीले अनिवार्य अवकास पाउन लागेको प्राधिकरणले जनाएको छ ।
असोजमा मोदी जलविद्युत कम्पनी लिमिटेडमा कार्यरत ६ तहका गणेशराज वाग्लेले पनि शैक्षिक प्रमाणपत्रका आधारमा अवकास पाउँदै छन् । ५ तहका ७, ४ तहका ७, ३ तहका ६, २ तहका ४ र १ तहका एक कर्मचारीले अनिवार्य अवकास पाउँदै छन् ।
