ऊर्जा खबर
काठमाडौं । बुटवल पावर कम्पनी लिमिटेडले ९ महिनामा साढे २६ करोड रुपैयाँ भन्दा बढी मुनाफा आर्जन गरेको छ । कम्पनीले सार्वजनिक गरेको वित्तीय विवरण अनुसार आर्थिक वर्ष (आव) २०७९/८० को तेस्रो त्रैमाससम्ममा सो नाफा आर्जन गरेको हो ।
साउनदेखि चैतसम्मको अवधिमा २६ करोड ६१ लाख ९५ हजार रुपैयाँ मुनाफा आर्जन गरेको कम्पनीले जनाएको छ । कम्पनीका अनुसार गत वर्षको तुलनामा कम्पनीको नाफा बढेको हो । गत वर्ष २३ करोड ७५ लाख ८२ हजार रुपैयाँ नाफा कमाएको थियो ।
यसैगरी, कम्पनीले जलविद्युत केन्द्रको विद्युत बिक्री गरी ५८ करोड ३१ लाख ७८ हजार रुपैयाँ आम्दानी गरेको छ । गत वर्षको तुलनमा विद्युत बिक्रीबाट हुने आम्दानी घटेको छ । गत वर्ष ५९ करोड ४८ लाख ३१ हजार रुपैयाँ आम्दानी गरेको थियो ।
कम्पनीले अन्य स्रोतबाट पनि ६ करोड ८० लाख १८ हजार रुपैयाँ आम्दानी गरेको सार्वजनिक वित्तीय विवरणमा उल्लेख छ । १२ मेगावाटको झिमरुक, ९.४ मेगावाटको आँधीखोला, ४ मेगावाटको खुदी र ३० मेगावाटको न्यादी खोला जलविद्युत आयोजना सञ्चालनमा छन् ।
