ऊर्जा खबर
काठमाडौं । नेपालमा पेट्रोलियम पदार्थको मूल्य उच्च गतिमा बढीरहेको बेला नेपाल विद्युत प्राधिकरणले एकैपटक २० वटा विद्युतीय सवारी भित्र्याएको छ । प्राधिकरण सामान्य सेवा विभागले पेट्रोल/डिजेलबाट चल्ने सवारीको विकल्पमा विद्युतीय गाडी ल्याएको हो ।
देशभित्र विद्युत खपत बढाउनुपर्ने त यसको दयितत्व प्राधिकरणको भएको हुँदा एकैपटक २० वटा सवारी (चार पाङ्ग्रे सानो गाडी) भित्र्याइएको विभागका प्रमुख विश्वनाथ शर्माले बताए । उनका अनुसार देशको विद्युत खपत बढाई वातावरण प्रदुषण नियन्त्रणमा सहयोग पुर्याउने उदेश्यले यी सवारी ल्याइएको हो ।
‘शुक्रबार (चैत २५ गते) सबै गाडी उपत्यका (काठमाडौं) आइपुगेका छन्’, उनले भने, ‘केन्द्रअन्तर्गत नै चलाउन यो सवारी ल्याइएको हो, कानून अनुसार वा सुविधा पाउनुपर्ने व्यक्तिलाई पहिले गाडी दिइनेछ ।’
यहाँ प्रयोग भएको पजेरो, प्राडोलाई प्राधिकरणकै अन्य कार्यालयमा स्थानान्तरण गरेर विद्युतीय सवारी सञ्चालन गरिनेछ। पेट्रोलियम पदार्थबाट सञ्चालन हुने सवारी हटाएर यी विद्युतीय गाडी चलाउँदा प्रतिसवारीबाट मासिक ५-७ लाख रुपैयाँसम्म बचत हुने पनि शर्माले बताए ।
अहिले प्राधिकरणले विभिन्न स्थानमा ५० वटा सवारी चार्जिङ स्टेसन निर्माण गरीरहेको छ । निर्माणाधीन चार्जिङ स्टेसनको काम आधा भन्दा बढी सकिएको छ । स्टेसनको काम आगामी २०७९ असारभित्र सम्पन्न गर्ने प्राधिकरणको लक्ष्य छ ।
५० वटै चार्जिङ स्टेसनको निर्माण सम्पन्न गरी सञ्चालनमा ल्याउन ३७ करोड ७० लाख ५५ हजार रुपैयाँमा ठेक्का सम्झौता भएको हो । हरेक चार्जिङ स्टेसनमा १४२ किलोवाट क्षमता (७१०० किलोवाट) को चार्जर, त्यसमा विद्युत आपूर्तिका लागि ५० केभिएको ट्रान्सफर्मर, अनलाइन बिलिङ प्रणाली जडान हुनेछ ।
