ऊर्जा खबर
काठमाडौं । बाराही हाइड्रो पावर पब्लिक लिमिटेडले आगामी कात्तिक ४ गतेदेखि साधारण सेयर निष्कासन गर्ने भएको छ । कम्पनीले बागलुङको कुश्मिशेरामा सञ्चालनमा रहेको १.५ मेगावाटको ठेउले खोला जलविद्युत केन्द्रको आयोजना प्रभावित स्थानीयका लागि साधारण सेयर निष्कासन गर्न लागेको हो ।
सय रुपैयाँ अंकित २ करोड ५० लाख रुपैयाँ बराबरको २ लाख ५० हजार कित्ता सेयर निष्कासन गर्ने तयारी गरेको कम्पनीले जनाएको छ । कम्पनीका अनुसार जिल्लाको जैमिनी नगरपालिकाको वडा नम्बर १, ४ र ५ साविक कुस्मीशेरा, सर्कुवा र विनामारे गाविस तथा जैमिनी नगरपालिकाका अन्य वडाहरुका स्थानीयका बासिन्दाको लागि सेयर निष्कासन गर्न लागिएको हो ।
स्थानीयले छिटोमा कात्तिक १८ गतेसम्म र ढिलोमा मंसिर ४ गतेसम्म आवेदन दिन सक्नेछन् । स्थानीयले न्यूनतम १० कित्तादेखि अधिकतम १० हजार कित्तासम्मका लागि आवेदन दिन सक्ने कम्पनीले जनाएको छ ।
कम्पनीले स्थानीयको सेयर निष्कासन गरी बाँडफाँड पूरा पछि दाेस्रो चरणमा सर्वसाधारणका लागि छुट्याएको ४ लाख ५० हजार कित्ता साधारण सेयर निष्कासन गर्नेछ । सेयर निष्कासन तथा बिक्री प्रबन्धकमा यसअघि नै एनआइबिएल एस क्यापिटल लिमिटेड नियुक्त गरिएको छ ।
२०७५ असार २४ गतेदेखि विद्युत उत्पादन भइरहेको आयोजनाको विद्युत् ७.५ किलोमिटर दूरीमा रहेको ३३ केभी कुस्मा सबस्टेसनमा जोडिएको छ । प्राधिकरणले उत्पादित विद्युतको हिउँदमा प्रतियुनिट ७.४२ रुपैयाँ र बर्खामा ४.२४ रुपैयाँ तिरिरहेको छ भने वार्षिक ऊर्जा औसत ८.२१७ गिगावाट घन्टा उत्पादन भइरहेको छ ।
.jpg)
