साढे ३ कराेड लगानीमा पोखरी गाउँमा बल्याे बिजुली

काठमाडाैं । कर्णाली प्रदेशकाे जुम्लाको तिला गाउँपालिका–७ मा रहेको पोखरी गाउँमा सौर्य ऊर्जामार्फत विद्युत सेवा विस्तार गरिएकाे छ । वैकल्पिक ऊर्जा प्रवर्द्धन केन्द्रकाे सहयाेगमा सेवा विस्तार गरिएकाे हाे ।

बिजुलीले गाउँ झिलीमिली बनेपछि स्थानीय हर्षित भएका छन् । केन्द्रको ३ करोड ३४ लाख र तिला गाउँपालिकाको ३० लाख रूपैयाँ साझेदारीमा सौर्य ऊर्जा निर्माण भएको गाउँपालिका अध्यक्ष मोतिलाल रोकायाले बताए ।

विद्युत् सेवा नहुँदा यहाँका स्थानीयवासी सल्लाको दियालोको भरमा अन्धकारमा बस्न बाध्य थिए, अब बिजुली आएकाे सबै खुसी भएकाे स्थानीय मुनबहादुर रोकायाले बताए । उनका अनुसार सौर्य ऊर्जाले गाउँ नै झिलीमिली पारेपछि बिजुली बाल्ने धोको पूरा छ।

वर्षायामको ६ महिना पोखरी गाउँका स्थानीय त्यही बस्छन् । गोठीमा पनि सौर्य ऊर्जाको बिजुली पुर्याइएको छ ।  सबै गरेर १२० घरमा बिजुली बालिएको केन्द्रले जनाएकाे छ । ५० किलोवाट क्षमताको सौर्य ऊर्जाले प्रत्येक घरमा ६ बल्ब राखिएको छ ।

एक घरले दुई बल्बभन्दा बढी बालेका छैनन् । गाउँमा पोलपोलमा बिजुली बालिएको छ । जतिबेला पनि मोबाइल चार्ज गर्न पाइएको छ । टिभी र वाइफाइ चलाउनसमेत सजिलो भएको स्थानीयले जानकारी दिए । उत्पादन भएको सबै बिजुली खपत नहुने भए पनि गाउँमा कुटानी, पिसानी र काठ चिरानी मेसिन राख्ने तयारी भइसकेको छ । जसका लागि वडापालिकाले बजेट छुट्याइसकेको छ ।