ऊर्जा खबर
काठमाडौं । रिडी पावर कम्पनी लिमिटेडले आफ्नो सेयरधनी सदस्यहरूका लागि अर्काे वर्ष राम्रो डिजिटमा लाभांशदिने प्रतिबद्धता जनाएकाे छ । शनिबार सम्पन्न सभामा कम्पनीका अध्यक्ष संजिव न्यौपानेले यस्तो बताएका हुन् ।
अध्यक्ष संजिव न्यौपानेको अध्यक्षतामा सम्पन्न साधारणसभाले आर्थिक वर्ष २०७९/८० को संचालक समितिको प्रतिवेदनमाथि छलफल गरी पारित गरेको छ । आर्थिक वर्ष २०८०/८१ को लागि लेखा परीक्षकको नियुक्त गर्नुको साथै निजको पारिश्रमिक समेत निर्धारण गरिएको छ ।
हालसम्ममा कम्पनीको मातहतमा २१.३१ मेगावाटका ४ वटा आयोजनाहरू संचालनमा छन् । कम्पनीले धादिङ जिल्लाको थाक्रे गाउँपालिकामा निर्माण गरिएको ५ मेगावाटको रैराङ जलविद्युत् आयोजनाले २०६१ सालदेखि विद्युत उत्पादन गरिरहेको छ । २.४ मेगावाटको रीडी खोला जलविद्युत आयोजनाले २०६६ सालदेखि विद्युत उत्पादन गरिरहेको छ ।
यसैगरी, पाँचथर र ताप्लेजुङ जिल्लाको सीमा भएर बग्ने इवा खाेलामा तेस्रो आयोजनाकाे रूपमा निर्माण गरेकाे इवा खोला जलविद्युत् आयोजनाले २०७६ साल आश्विन २० गतेबाट व्यवसायिक उत्पादन सुरु गरेको हो । ८.५ मेगावाटको बुटवल ग्रिड जडित सौर्य विद्युत आयोजनाले पनि २०७७ कार्तिक १५ गतेदेखि निरन्तर विद्युत उत्पादन गरिरहेको छ ।
यसैगरी, कम्पनीको लगानी रहेको साझापावर डेभलपमेन्ट प्राइभेट लिमिटेडले अहिले २० मेगावाट क्षमताको तल्लो बलेफी खोला जलविद्युत् आयोजना निर्माण गरिरहेको छ । यस आयोजनामा कुमारी बैंकको मुख्यलगानी छ । यस आयोजनामा लगानीकर्तालाई संस्थापक सेयरमा लगानी गर्ने अवसर दिइरहेको पनि कम्पनीले जानकारी दिएको छ ।
