ऊर्जा खबर
काठमाडौं । दुई जलविद्युत कम्पनीले बिजुली बेचेर ४८ करोड रुपैयाँ आम्दानी गरेका छन् । राधी विद्युत कम्पनीले लिमिटेड र अपि पावर कम्पनी लिमिटेडले आर्थिक वर्ष (आव) २०७९/८० को ९ महिनाको अवधिमा सो आम्दानी गरेका हुन् ।
कम्पनीहरूले सार्वजानिक गरेको आव तेस्रो त्रैमासको वित्तीय विवरण अनुसार साउनदेखि चैतसम्मको अवधिमा ४७ करोड ७७ लाख ९५ हजार ९ सय रुपैयाँ आम्दानी गरेका छन् । गत वर्षको तुलनामा दुई कम्पनीको विद्युत बिक्रीबाट हुने आम्दानी घटेको देखिएको छ । गत वर्ष यी कम्पनीले ५४ करोड ४४ लाख ६३ हजार ४ सय रुपैयाँ आम्दानी गरेका थिए ।
राधी विद्युत कम्पनीले जलविद्युत केन्द्रको विद्युत बिक्री गरी १० करोड ८२ लाख ९० हजार ७ सय रुपैयाँ र अपि पावर कम्पनीले ३६ करोड ९५ लाख ५ हजार २ सय रुपैयाँ आम्दानी गरेको सार्वजनिक वित्तीय विवरणमा उल्लेख छ ।
यसैगरी, उक्त दुई कम्पनीले ९ महिनाको अवधिमा १३ करोड ६७ लाख ७ हजार ५ सय रुपैयाँ खुद नाफा कमाएका छन् । उत्पादन आम्दानी घटेपछि कम्पनीको नाफा पनि घटेको देखिएको छ । दुई कम्पनीले गत वर्ष २२ करोड २७ लाख ६३ हजार २ सय रुपैयाँ नाफा कमाएका थिए ।
राधी विद्युत कम्पनीको लमजुङमा ४.४ मेगावाटको राधी स्मल र अपि पावरको ८.५ मेगावाटको नौगड, ८ मेगावाटको माथिल्लो नौगड जलविद्युत आयोजना सञ्चालनमा छन् ।
