ऊर्जा खबर
काठमाडौँ । नासा हाइड्रो पावर कम्पनीको सडक बनाउन गएका दोलखा जिल्लाको विगु गाउँपालिकाका १८ वर्षीय कुसुम तामाङको ज्यान गएको छ । दोलखाको उत्तरी लामाबगरबाट लप्ची जाने सडक निर्माणको क्रममा खसेको सुख्खा पहिरोमा पुरिएर तामाङको मृत्यु भएको हाे ।
यसैगरी, पहिराेले पुरिएर २ जना घाइते भएका छन् । पहिरोमा पुरिएर घाइते हुनेमा सोही स्थानका २२ वर्षीय रसमान तामाङ र २८ वर्षीय दिलकुमार तामाङ रहेको उद्धारमा खटिएका सशस्त्र प्रहरी बल बोर्डर आउट पोष्ट (बिओपी) लामावगरका प्रहरी निरिक्षक (इन्स्पेक्टर) जयन्त केसीले जानकारी दिए । उनीहरू तीनै जना नासा हाइड्रो पावरको सडक निर्माणका काम गर्ने मजदुर हुन् ।
लामावगरवाट लप्ची जाने सडक निर्माणको क्रममा देउराली र हुर्हुरे भन्ने स्थानमा शनिबार दिउँसो करिव ३ बजे माथिवाट खसेको सुख्खा पहिरोले उनीहरूलाई पुरेको केसीले जानकारी दिए । घाइतेलाइ उपचारका लागि हेलिकम्पटरमा काठमाडाैँ ल्याइएकाे छ ।
पहिरोका कारण घटनास्थलतर्फ जाने सडक र बाटो अवरुद्ध भएको तथा मौसम प्रतिकुलताका कारण हेलिकोप्टर आउन नसक्दा उनीहरूको उद्धारमा कठिनाई भएको इन्स्पेक्टर केसीले जानकारी दिए ।
यो आयोजनाको सडक निर्माणको क्रममा यसअघि पनि भीरबाट खसेर एक ४९ वर्षीय दिलबहादुर घर्तीको ज्यान गएको थियो । त्यो भन्दा अघि पनि नासा हाइड्रो पावरको सुमो कन्ट्रक्सनमा कार्यरत ३ जनाको भीरबाटै लडी नदीमा डुबेर ज्यान गइसकेको छ ।
दुगड ग्रुपले प्रवद्र्धन गरेको १६० मेगावाट क्षमताको लप्ची खोला जलविद्युत् आयोजनाका लागि लामाबगरदेखि सडक निर्माणाधीन छ । आयोजनाले लामाबगरमा ११०० मिटर सुरूङ समेत निर्माण गरेको छ । कुल २० किलोमिटर सडक मध्ये देराली, खराने खोला र हुर्हुरेको सबैभन्दा कठिन भीर काटेर सडक खोल्ने काम जारी छ ।
.jpg)
