ऊर्जा खबर
रसुवा । सालासुङ्गी पावर लिमिटेडले निर्माण गरी सञ्चालनमा ल्याएको ७८ मेगावाटको साञ्जेन खोला जलविद्युत् केन्द्रको १० प्रतिशत सेयर स्थानीयवासीले पाउने भएका छन् । चाइना हार्बर इन्जिनियरिङ कम्पनी र वाइड रिसोर्सेस लिमिटेड हङकङको ९२ प्रतिशत संयुक्त लगानी र नेपाली साझेदारको ८ प्रतिशत लगानी गरी निजी क्षेत्रबाट निर्माण भएको उक्त केन्द्रको सेयर रसुवाका स्थानीयवासीलाई वितरण गरिने भएको हो ।
स्थानीय बासिन्दाको मागबमोजिम सेयर दिने निर्णयसहित प्रक्रिया अघि बढाएको कम्पनीले जनाएको छ । सेयर पाउनुपर्ने माग गर्दै विरोधमा उत्रेका स्थानीय बासिन्दालाई सेयर दिन आयोजना तयार भएको हो ।
निजी क्षेत्रबाट करिब रु २० अर्ब लगानीमा निर्माण भएको ७८ मेगावाटको सो विद्युत् आयोजना सन् २०१९ मा सुरु भई सन् २०२५ मा सम्पन्न भएको हो । विद्युत्गृहका इञ्जिनीयर राजु श्रेष्ठका अनुसार समुद्री सतहदेखि करिब ३ हजार ४ सय मिटर उचाइमा बाँध बाँधेर निर्माण गरिएको उक्त आयोजनाबाट हिउँदमा १५ मेगावाट मात्र विद्युत् उत्पादन हुन्छ ।
आमाछोदिङ्मो गाउँपालिका– ५ का वडाध्यक्ष रामबहादुर तामाङले स्थानीय बासिन्दालाई सेयर दिने सन्दर्भमा आयोजनाका तर्फबाट जानकारीसहित पत्र प्राप्त भएसँगै विरोधका कार्यक्रम स्थगित भएका जानकारी दिए ।
स्थानीयस्तरको जल, जङ्गल र जमिन एवं प्राकृतिक स्रोत परिचालन गरी निर्माण भएका वा गराउँदा तयार हुने सबै प्रकारका संरचनासँग सम्बन्धित गतिविधिमा प्रभावित पक्षलाई प्राथमिकताका साथ सेयर दिनुपर्ने माग स्थानीयले उठाउँदै आएका थिए ।
