सम्मेलनका उपलब्धिहरूलाई सरकारले आत्मसात गरेर अगाडि बढ्छ : मन्त्री बस्नेत

काठमाडौं । ऊर्जा, जलस्रोत तथा सिँचाइ मन्त्री शक्तिबहादुर बस्नेतले दुई दिनसम्म आयोजना भएको ऊर्जा सम्मेलनले प्राप्त गरेका उपलब्धिहरूलाई आत्मसात गरेर अगाडि बढ्ने बताएका छन् । बैशाख ५ र ६ गते काठमाडौंमा आयोजना भएको ‘ऊर्जा सम्मेलन, २०२३’ को समापनका क्रममा उनले यस्तो बताएका हुन् ।

सम्मेलनले दिएका सुझाव तथा सल्लाहलाई सरकारले आगमी दिनमा निर्माण गर्ने कानुनमा समावेश गरेर जाने र निजी क्षेत्रलाई सहजीकरण गर्ने मन्त्री बस्नेतले बताए । ‘निजी क्षेत्रलाई उत्पादनमा जस्तै विद्युत व्यापारमा समेत सहजीकरण गर्दै लगिनेछ,’ उनले भने, ‘प्राप्त सबै उपलब्धिलाई संस्थागतरूपमा लिएर सरकार र निजी क्षेत्र मिलेर अगाडि बढ्नुपर्छ ।’

समापन कार्यक्रममा स्वतन्त्र ऊर्जा उत्पादकहरूको संस्था नेपाल (इपान) का अध्यक्ष कृष्णप्रसाद आचार्यले विद्युत व्यापारको ढोका खोलिदिन सरकारसँग आग्रह गरे । उनले अबको आर्थिक क्रान्ति भनेको ऊर्जाबाट हुने पनि बताए ।

यसैक्रममा भारतको प्रतिष्ठित औद्योगिक घराना अर्थात् वेदान्ता लिमिटेड नेपालबाट २ हजार मेगावाटसम्म विद्युत किन्न इच्छा देखाएको छ । मंगलबारदेखि सुरु आएको दुई दिने ऊर्जा सम्मेलनको दोस्रो दिन अर्थात् बुधबारको समापन सत्रमा उसले यस्तो घोषणा गरेको हो ।

वेदान्ताका प्रमुख कार्यकारी अधिकृत विभव अग्रवालले नेपाल पावर एक्सचेन्ज कम्पनी (नेपेक्स) मार्फत उक्त परिमाणमा विद्युत खरिद गर्न चाहेको भन्दै आशयपत्र पेश गरेको जानकारी दिए । यस भारतीय कम्पनीले शून्य कार्बनको नीति अनुसार नेपालबाट दीर्घकालीनरूपमा विद्युत खरिद गर्न चाहेको जनाएको छ । यसको समन्वय ऊर्जा सम्मेलनका संयोजकसमेत रहेका नेपेक्सका प्रमुख कार्यकारी अधिकृत आशिष गर्गले गरेको पनि जनाइएको छ ।