बुकु–काप्टी जलविद्युत् आयोजनाले ३३ केभीको १० किलोमिटर लामो प्रसारण लाइन बनाउने

काठमाडौँ । हिमस्टार ऊर्जा कम्पनी लिमिटेडले ३३ केभीको १०.९ किलोमिटर लामो सिङ्गल सर्किट विद्युत् प्रसारण लाइन निर्माण गर्ने भएको छ । कम्पनीले ओखलढुङ्गाको खिजिदेम्बा गाउँपालिका–८ मा निर्माण गरिरहेको बुकु–काप्टी जलविद्युत् आयोजनाको विद्युत् प्रसारण गर्न लाइन निर्माण गर्ने भएको हो । 

आयोजनाको स्वीचयार्डदेखि सोलुखुम्बुको लिखुपिके गाउँपालिका–२ हुँदै रामेछापको उमाकुण्ड गाउँपालिका–२ मा रहेको बाम्ती सबस्टेशनमा जोड्ने गरी लाइन निर्माण गर्ने भएको छ । यसका लागि अनुमति माग्दै विद्युत् विकास विभागमा आवेदन दिएको विभागले जनाएको छ । 

कुल ५ मेगावाट विद्युत् प्रसारण गर्न सकिने लाइनमा कुल १९० वटा स्टिल टुबुलर पोल रहेन आयोजनले जानकारी दिएको छ । प्रसारण लाइनको निर्माण कार्य १२ महिनाभित्र सम्पन्न गरिने जनाइएको छ ।