बंगलादेशमा बर्खाका ६ महिना ४० मेगावाट बिजुली निर्यात गर्ने गरी सम्झौता हुने

काठमाडौँ । नेपाल विद्युत् प्राधिकरण र बंगलादेश पावर डेभलपमेन्ट बोर्ड (बिपिडिबी) बीचको विद्युत् बिक्री वार्ता सकारात्मक रूपमा अगाडि बढेको छ । विद्युत् बिक्री सम्झाैताका लागि वार्ता गर्न कार्यकारी निर्देशक कुलमान घिसिङकाे नेतृत्वमा बुधबार बंगलादेश पुगेकाे नेपाली प्रतिनिधी टाेली र बिपिडिबीबीच वार्ता सकारात्मक दिशामा अघि बढेकाे हाे । नेपाली टोली र बिपिडिबीअन्तर्गतको बोलपत्र (बिड) मूल्याङ्कन समितिबीच बिहीबार बंगलादेशको ढाकामा वार्ता भएको थियो ।

वार्तामा आगामी वर्षायामबाटै बंगलादेशमा विद्युत् निर्यात गर्ने गरी दुई पक्षबीच जतिसक्दो छिटो विद्युत् बिक्री सम्झौता (पावर सेल्स एग्रिमेन्ट) गर्ने सहमति भएको छ । विद्युत् बिक्री सम्झौतामा राखिने हरेक बुँदामा विस्तृत छलफल भएको र यसलाई अन्तिम रूप दिएर छिट्टै सम्झौता गर्ने सहमति भएको कार्यकारी निर्देशक घिसिङले बताए । 

‘बिपिडिबीले त्यहाँको नियमन कानुनबमोजिम हामीसँग माग गरेअनुसार विद्युत बिक्रीको परिणामसहितको बोलपत्र पेश गरेका थियौँ, हामीले पेश गरेको प्रस्ताव र सम्झौतामा राखिने बुँदाहरूमा  विस्तृत रुपमा छलफल गर्यौं’, घिसिङले भने, ‘उहाँहरूले पनि माथिल्लो निकायबाट स्वीकृति लिनुपर्ने रहेछ, स्वीकृतिलगायतका प्रक्रिया जति सक्दो छिटो सकेर आउँदो वर्षायामबाटै नेपालबाट विद्युत खरिद गर्ने गरी सम्झौता गर्ने सहमति जुटेको छ ।’

प्राधिकरणले हरेक वर्ष १५ जुनदेखि–१५ नोभेम्बरसम्म वर्षायामका ६ महिनामा ४० मेगावाटसम्म विद्युत् निर्यातका लागि बंगलादेशसमक्ष प्रस्ताव राखेको छ । पाँच वर्षका लागि विद्युत् बिक्री सम्झौता गर्न लागिएको छ । नेपालले ढल्केबर–मुजफ्फपुर ४०० केभी अन्तरदेशीय प्रसारण लाइनमार्फत् भारतको बरमपुर–भेरामारा प्रसारण लाइनबाट विद्युत् निर्यात गर्ने गरी सम्झौता गर्ने छ ।