ऊर्जा खबर
काठमाडौँ । अपर लोहोरे खोला हाइड्रोपावर कम्पनी लिमिटेडको हकप्रद सेयर निष्कासन तथा बिक्री प्रबन्धकमा एनआइसी एसिया क्यापिटल लिमिटेड नियुक्त भएको छ । दुई कम्पनीबीच भएको नियुक्ति सम्झौता पत्रमा अपर लोहोरे खोलाका प्रमुख कार्यकारी अधिकृत सदिच्छा कार्की र एनआइसी एसिया क्यापिटलका प्रमुख कार्यकारी अधिकृत रामेन्द्र रायमाझीले हस्ताक्षर गरेका छन् ।
सम्झौता अनुसार अपर लोहोरे खोलाका सेयर धनीलाई १ः१.५ को अनुपातमा (१५० प्रतिशत) प्रतिकित्ता १०० रुपैयाँ अङ्कित दरका ७६ लाख ४७ हजार ६० कित्ता सेयरको निष्कासन तथा बिक्री गरिने छ । कम्पनीले दैलेखमा ४ मेगावाटको माथिल्लो लोहोरे खोला जलविद्युत् आयोजना सञ्चालन गरिरहेको छ ।
एनआइसी एसिया क्यापिटलले हालसम्म सामूहिक लगानी कोष तथा डिबेन्चरसहित २० वटा कम्पनीको धितोपत्र निष्कासन र ४ वटा कम्पनीको हकप्रद सेयर निष्कासन कार्य सम्पन्न गरिसकेको जनाएको छ ।
