ऊर्जा खबर
काठमाडौं । उद्योग, वाणिज्य तथा आपूर्ति मन्त्रालयले नेपाल आयाल निगमको कार्यकारी निर्देशक नियुक्ति गर्न गठित सिफारिस समितिले सूचना जारी गरी दरखास्त आह्वान गरेको छ । मन्त्रालयले निगमकाे रिक्त पदपूर्ति गर्न आवेदन माग गरेको हो ।
इच्छुकले सूचना प्रकाशन भएको मितिले २१ दिनभित्र कार्यालय समयमा मन्त्रालयको सरकारी उद्योग तथा संस्थान शाखा, सिंहदरबारमा दरखास्त दिन सक्ने छन् ।
सूचनाअनुसार दरखास्त दिने अन्तिम मितिसम्म ३५ वर्ष पुगेको र ६५ वर्ष ननाघेको, मान्यता प्राप्त विश्वविद्यालयबाट निगमको कार्य प्रकृतिसँग सम्बन्धित विषय वा प्रशासन व्यवस्थापन, अर्थशास्त्र, इञ्जिनियरिङ वा कानूनमा स्नातकोत्तर गरेको हुनुपर्नेछ । साथै, कुनै संस्था वा निकायको व्यवस्थापकिय जिम्मेवारीमा कम्तीमा ५ वर्ष काम गरेको अनुभव हुनु पर्नेछ ।
निगमका तत्कालीन कार्यकारी निर्देशक उमेशप्रसाद थानीले व्यक्तिगत कारण देखाएर पदबाट राजीनामा दिएपछि उक्त पद रिक्त रहँदै आएको छ । निगमका कार्यकारी निर्देशक थानीले गत मंसिर २७ गने राजीनामा दिएका थिए । उनको १५ महिना कार्यकाल बाँकी छँदै राजीनामा दिएका हुन् । थानीको राजीनामापछि रिक्त रहेको पदमा तत्कालका लागि नागेन्द्र साहलाई निमित्त प्रमुखको जिम्मेवारी दिइएको छ ।
