ऊर्जा खबर
काठमाडौं । नेपाल विद्युत प्राधिकरणले नयाँ बुटवल–लमही प्रसारण लाइन आयोजना निर्माण गर्ने भएको छ । प्राधिकरणले १ सय ६० किलोमिटर लामो ४०० केभी डबल सर्किट प्रसारण लाइन निर्माण प्रक्रिया अघि बढाएकाे हाे ।
लुम्बिनी प्रदेश नबलपरासी सुस्ता पश्चिम जिल्लामा रहेको नयाँ बुटबल सबस्टेसन (भूमही) देखि रुपन्देही, कपिलवस्तु जिल्लाको मोतिपुर सबस्टेसन, अर्घाखाँची हुँदै दाङको लमही सबस्टेसनसम्मको लाइन निर्माण प्रक्रिया अघि बढाएको हो ।
प्रसारण लाइन नबलपरासीको सुनवल, रुपन्देहीको देवदह, सैनामैना, बुटबल उपमहानगरपालिका, कपिलवस्तुको बाणगंगा, बुद्धभुमी, शिवराज नगरपालिका, अर्घाखाँचीको शीतगंगा नगरपालिका र दाङको गढवा, राप्ती सोनारी गाउँपालिका र लमही नगरपालिकासम्म प्रस्ताव गरिएको छ ।
आयोजनाले प्रसारण लाइनको प्रारम्भिक वातावरणीय परीक्षण (आइइई) प्रतिवेदन तयारी गर्ने काम भइरहेको प्राधिकरणले जनाएको छ ।
