ऊर्जा खबर
काठमाडौं । सरकारले बैशाख ९ र १० गते काठमाडौंमा ‘तेस्रो लगानी सम्मेलन २०८१’ आयोजना गर्ने भएको छ । विदेशी लगानीमा मात्रै केन्द्रित नभएर स्वदेशी, गैरआवासीय नेपाली (एनआरएनए) लगायतबाट लगानी ल्याउन सम्मेलन गर्न लागिएको हो ।
लगानी सम्मेलनका लागि अर्थमन्त्री प्रकाशशरण महतको संयोजकत्वमा निर्देशक समिति गठन गरिएको छ ।उक्त निर्देशक समितिको पहिलो बैठक आइतबार (मंसिर १० गते) बसेको हो । सम्मेलनले औपचारिकताभन्दा पनि वास्तविक लगानीकर्तालाई आकर्षित गरिने महतले बताए । ठूलो लगानीलाई मात्रै नहेरी रोजगार सिर्जना गर्ने, उत्पादनका
क्षेत्रमा मद्दत पुर्याउने, छिमेकी देशबाट धेरै उद्योग व्यवसाय ल्याउनेलाई मध्यनजर गर्दै काम गर्ने तयारी गरिएको पनि महतले बताए।
लगानी सम्मेलन आयोजना गर्न मुख्यसचिवको नेतृत्वमा कार्यान्वयन समिति, उद्योग वाणिज्य तथा आपूर्ति मन्त्रालयका सचिवको नेतृत्वमा प्राविधिक समिति छ । तेस्रो लगानी सम्मेलनको सचिवालय लगानी बोर्डको कार्यालयमा रहने जनाइएको छ ।
सम्मेलनका लागि आवश्यक कानूनी सुधार, प्राविधिक विषय, लगानीकर्तालाई सम्मेलनबारे जानकारी दिनेलगायत काम कार्यान्वयन समिति र प्राविधिक समितिमार्फत गरिने जनाइएको छ ।
