ऊर्जा खबर
काठमाडौँ । ऊर्जा, जलस्रोत तथा सिँचाइ मन्त्रालयले दुई विभागका महानिर्देशकको जिम्मेवारी परिवर्तन गरेको छ । मन्त्री विराजभक्त श्रेष्ठको निर्णयअनुसार मन्त्रालयले विद्युत् विकास विभागको महानिर्देशकको जिम्मेवारी सहसचिव सागरराज गौतमलाई र सिँचाई विभागको महानिर्देशकको जिम्मेवारी डा. महेश्वर श्रेष्ठलाई दिएको छ ।
यसअघि गौतम मन्त्रालयको विकास सहायता तथा प्रादेशिक समन्वय महाशाखामा कार्यरत थिए । श्रेष्ठ भने कार्यक्रम, बजेट तथा अनुगमन महाशाखामा कार्यरत थिए ।
त्यस्तै, मन्त्रालयले विद्युत् विकास विभागकी महानिर्देशक मनदेवी श्रेष्ठ र सिँचाइ विभागका महानिर्देशक मित्र बराललाई मन्त्रालय सरुवा गरेको छ ।
त्यसैगरी, विभागका उपमहानिर्देशक गोकर्णराज पन्थलाई विद्युत् नियमन आयोगको सचिवको जिम्मेवारी दिने तयारी छ । उनले यसअघि पनि आयोगको सचिवका रूपमा गरिसकेका छन् । विभागका अर्का उपमहानिर्देशक सुनिल पौडेललाई पनि मन्त्रालयमा सरुवा गर्ने तयारी छ ।
सहसचिवहको जिम्वारी हेरफेर तथा सरुवाबारे निर्णय भए पनि औपचारिक पत्र तयार गरी हस्तान्तरण नभइसकेको ऊर्जा मन्त्रीको सचिवालयका एक सदस्यले बताए ।
