ऊर्जा खबर
काठमाडौं । एक महिनामै ग्यासको मूल्य प्रतिसिलिन्डर ४५० रुपैयाँ बढेको छ । नेपाल आयल निगमले भदौ १५ गतेदेखि असोज १४ गतेसम्मको अवधिमा दुई पटक मूल्य बढाएको हो ।
दशैं, तिहार, छठ जस्ता चाडबाड नजिकिरहेका बेला निगमले इन्डियन आयल कर्पोरेशन (आइओसी) बाट मूल्य बढेर आएको भन्दै आइतबार (असोज १४ गते) देखि लागु हुनेगरी ग्यासको मूल्य प्रतिसिलिन्डर २१५ रुपैयाँले बढाएको छ । आइओसीले प्रतिसिलिन्डर १७३.४५ रुपैयाँ बढाएर नयाँ मूल्यसूची पठाएपछि निगमले ‘पेट्रोलियम पदार्थ तथा ग्यासको स्वचालित मूल्य प्रणाली कार्यविधि २०८०’ अनुसार मूल्य वृद्धि गरेको जनाएको छ ।
नयाँ मूल्यअनुसार ग्यास प्रतिसिलिन्डर २ हजार ११० कायम भएको छ । यसअघि १ हजार ८९५ रुपैयाँ थियो । निगमले गत भदौ १५ गते पनि ग्यासको मूल्य प्रतिसिलिन्डर २३५ रुपैयाँ वृद्धि गरेको थियो ।
ग्यासको मूल्य एक महिनाअघि
प्रतिलिसिन्डर १ हजार ६६० रुपैयाँ थियो । अहिले ४५० रुपैयाँ बढेर २ हजार ११० रुपैयाँ पुगेको छ । निगमले गत साउन १६ गते भने ग्यासको मूल्य प्रतिसिलिन्डर ११७.६२ रुपैयाँ घटाएको थियो ।
ग्यासको मूल्यसँगै आयात परिमाण पनि बढिरहेको छ । आर्थिक वर्ष (आव) साउन र भदौमा ७ अर्ब ३२ करोड ६३ लाख १३ हजार रुपैयाँ बराबरको ८ करोड ८२ लाख ७१ हजार ४८६ केजी ग्यास आयात भएको भन्सार विभागको तथ्यांक छ ।
नेपालमा वार्षिक रुपमा झण्डै ६० अर्ब रुपैयाँको ग्यास आयात हुने गरेको छ । गत आव (२०७९÷८०) मा ५८ अर्ब १५ करोड ४१ लाख १४ हजार रुपैयाँ बराबरको ५१ करोड ४३ लाख ४० हजार ७६८ केजी ग्यास आयात भएको विभागको तथ्यांक छ ।
सरकारले विद्युतीय चुलोलाई प्रवर्द्धन गर्ने नीति लिए पनि आवश्यक पूर्वाधारको अभाव र विद्युतीय चुलोप्रति सर्वसाधारण आकर्षित हुन नसक्दा वर्षेनी खाना पकाउने ग्यासको आयात तथा खपत बढिरहेको छ ।
