ऊर्जा खबर
काठमाडौं । भारतीय आयल कर्पोरेसन (आइओसीले) नेपालका लागि इन्धनको नयाँ मूल्यसूची पठाएको छ । नेपाल आयल निगमले आइतबार विज्ञप्ति जारी गर्दै आइओसीले नयाँ मूल्य पठाएको जानकारी दिएको हो ।
आइओसीले नयाँ मूल्य पठाएसँगै निगमलाई आगामी १५ दिनमा करिब ५ अर्ब १९ करोड रूपैयाँ घाटा हुने देखिएको विज्ञप्तिमा उल्लेख छ । आइओसीले पठाएको मूल्यसूची अनुसार निगमलाई पेट्रोलमा प्रतिलिटर २३.०२ रूपैयाँ र डिजेलमा ४०.१३ रूपैयाँ घाटा हुने देखिएको छ । हाल पेट्रोल लिटरको १६० र डिजेल १४३ रूपैयाँमा बिक्री भइरहेको छ ।
त्यस्तै, प्रतिसिलिन्डर एक हजार ६
सयमा बिक्री भइरहेको खाना पकाउने एलपी ग्यासमा निगमलाई १०५०.१८ रुपैयाँ घाटा हुने निगमले जनाएको छ ।
निगमलाई मट्टीतेल, हवाई इन्धनमा भने नाफा छ । मट्टीतेलमा प्रतिलिटर २.८१ रूपैयाँ, हवाई इन्धन आन्तरिकतर्फ १२.६४ रूपैयाँ र बाह्यतर्फ ६४.६९ रूपैयाँ नाफा रहेको निगमले जनाएको छ ।
आइओसीले यसअघि पनि (बैशाख ३ गते) नेपालका लागि इन्धनको नयाँ मूल्यसूची पठाएको थियो । वैशाख ३ को मूल्यअनुसार निगमलाई १५ दिनमा करिब तीन अर्ब ७४ करोड रूपैयाँ घाटा हुने देखिएको थियो । वैशाख १८ गते आइतबारको नयाँ मूल्य आएसँगै अब घाटा पाँच अर्ब नाघ्ने निगमले जनाएको छ ।
