ऊर्जा खबर
काठमाडौं । स्वदेशी लगानीमा निर्माण हुन लागेको १०६ मेगावाटको अर्धजलाशय जगदुल्ला जलविद्युत आयोजनाको निर्माण छिटो सुरु गर्न ऊर्जा, जलस्राेत तथा सिँचाइ मन्त्रालयले निर्देशन दिएकाे छ । स्थलगत अवलाेकन भ्रमणमा गएकाे मन्त्रालयकाे टाेलीले आवश्यक तयारी पूरा गरी छिटाे काम सुरु गर्न निर्देश गरेकाे हाे ।
मन्त्रालय ऊर्जा महाशाखाका सहसचिव मधुप्रसाद भेटुवाल, आयाेजना प्रमुख सहितकाे टाेलीले गत साता आयाेजनास्थलकाे निरिक्षण तथा अवलाेकन गरेकाे थियाे । अवलाेकनका क्रममा भेटुवालले देशलाइ अर्धजलाशय आयाेजनाकाे खाँचाे परेकाे हुँदा यसलाइ सक्दाे चाँडाे निर्माणमा लैजानुपर्ने बताए ।
आयोजनाको स्थलगत निरीक्षण तथा अनुगमनका क्रममा भेटुवालले आयोजनाको प्रगतिलाई थप अद्यावधिक गरी तत्कालै मुख्य निर्माणको काम सुरु गर्न पनि निर्देशन दिएका छन् । साथै, कर्णाली प्रदेशका ऊर्जा मन्त्रीसँग छलफल गरी आयोजनालाई समयमै सम्पन्न गर्न आवश्यक सहयोगका विषयमा छलफल गर्नुपर्ने उनकाे धारणा थियाे ।
डाेल्पामा निर्माण हुने आयोजनाको विद्युतगृह मुड्केचुला गाउँपालिका–४, इलमा निर्माण हुने तथा जगदुल्ला गाउँपालिका वडा नम्बर १ र २ मा बाँध निर्माण हुने अध्ययनले देखाएकाे छ । काम सुरु गरेकाे करिब ६ वर्षभित्र पूरा गर्ने लक्ष्य लिइएको आयाेजनाकाे करिब ७.१ किलोमिटर भूमिगत सुरुङ निर्माण गरी इलस्थित विद्युतगृहमा खसालिने छ ।
कूल ३०७ मेगावाट विद्युत् उत्पादन गर्ने लक्ष्यका साथ काम थालिएको भए पनि भौगोलिक विकटताका कारण १०६ मेगावाटमात्र विद्युत् उत्पादन गर्न सकिने गरी क्षमता अद्यावधिक (अप्टिमाइजेसन) गरिएकाे आयाेजनाले जानकारी दिएकाे छ ।
आयोजनाको विस्तृत परियोजना प्रतिवेदन (डिपिआर) अनुसार आयोजना सम्पन्न गर्नका लागि १९ अर्ब ९० करोड रुपैयाँ लागत अनुमान गरिएको छ । यसअघिकाे अनुमानित लागत २२ अर्ब रुपैयाँ थियाे । आयोजना सम्पन्न भएपछि वार्षिक ६१५.३२ गिगावाट घन्टा विद्युत उत्पादन हुनेछ । आयोजनाबाट उत्पादीत विद्युत ४५ किलोमिटर लामो प्रसारण लाइन मार्फत नेपाल विद्युत प्राधिकरणको नलगाड सबस्टेसनमा जोडिनेछ ।
.jpg)
