ऊर्जा खबर
काठमाडौं । विद्युतको उच्च माग बढेर १७ सय मेगावाट पुग्न लागेको छ । शुक्रबार (अस्ति) यसअघिको उच्च मागको रेकर्ड पार भई १६९१ मेगावाट विद्युत खपतको नयाँ रेकर्ड कामय हुन पुगेको हो ।
उद्योगधन्दा पूर्णरूपमा सञ्चालन हुँदा, तराईका जिल्लामा तापक्रम बृद्धि भई एसी, पंखा लगाएतका विद्युतीय उपकरणको उपयोग बढेकाले विद्युतको उच्च माग पनि बढ्न पुगेको नेपाल विद्युत प्राधिकरण प्रणाली सञ्चालन विभागले जनाएको छ । विभागका अनुसार शुक्रबार इतिहासकै बढी विद्युत खपत भएको हो ।
अहिले विभिन्न नाकाबाट १ सय मेगावाट हाराहारीमा नेपालको विद्युत भारततर्फ गइरहेकाले त्यसलाई पनि खपतमा जोडिएको विभागले जानकारी दिएको छ । शुक्रबार विद्युत प्राधिकरणको १०६८५ मेगावाट घन्टा, प्राधिकरणका सहायक कम्पनीको ८४६७ मेगावाट घन्टा, निजी क्षेत्रको १२४८४ मेगावाट घन्टा आन्तरिक उत्पादन र भारतबाट आयात भएको १७३ मेगावाट घन्टा विद्युतबाट माग र आपूर्ति व्यवस्थापन गरिएको प्राधिकरणले जनाएको छ ।
यही अवधिमा नेपालको १३२ केभी रक्सौल–परवानीपुर, कुशाहा–कटैयालगायतका प्रसारण लाइनमार्फत भारततर्फ पनि १५२७ मेगावाट घन्टा विद्युत निर्यात भएको छ । यसअघि बिहीबारको उच्च माग १६०६ मेगावाट हाराहारीमा थियो ।
आन्तरिक उत्पादन बढेकाले अहिले भारतबाट आउने विद्युत परिमाण भने घटेको छ । हिउँदमा साढे ८ सय मेगावाट हाराहारीमा विद्युत आयात भएकोमा अहिले भारतको बिहार राज्यमा निर्यात भइरहेको छ ।
कोरोना (कोभिड–१९) महामारीको दोस्रो लहरका बेला १ हजारदेखि १२ सय मेगावाट हाराहारीमा रहेको विद्युत उच्च माग निशेधाज्ञा खुले यता क्रमशः उकालो लागेको छ । विद्युतको उच्च माग बृद्धि हुँदा उपत्यकाको खपत पनि बढिरहेको प्राधिकरणले जनाएको छ । उत्पादन बढिरहेकाले विद्युतको आन्तरिक बजार विस्तार गर्न प्राधिकरणले पनि ग्राहक वर्गमा खपत बढाउन आग्रह गर्दै आएको छ ।
