ऊर्जा खबर
काठमाडौं । चालु आर्थिक वर्ष (आव) २०७९/८० को ७ महिनामा साढे ४ हजार तीन पाङ्ग्रे विद्युतीय गाडी भित्रिएका छन् । भन्सार विभागको तथ्यांक अनुसार चालु आवको साउनदेखि माघसम्मको आवधिमा उक्त गाडीहरू नेपाल भित्रिएका हुन ।
विभागका अनुसार अहिलेसम्ममा ४ हजार ६ सय ५१ वटा तीन पाङ्ग्रे विद्युती गाडी भित्रिएका छन् । ती मध्ये चीनबाट अनएसेम्बल विद्युती गाडी ३ सय ४८ आयात भएका छन् । यस्तै, विद्युतीय गाडी ३ हजार ६ सय २ वटा गाडी भित्रिएकाे विभागकाे तथ्यांकमा उल्लेख छ । भारतबाट अहिलेसम्म ७ सय १ वटा तीन पाङ्ग्रे विद्युतीय सावरी आयत भएको विभागले जनाएको छ ।
यसैगरी, विभागका अनुसार यो माघसम्मको अवधिमा भारतबाट टाटाका विद्युतीय गाडी नेक्सन, टिपर इभी लगायत १४३५ वटा सवारी भित्रिएका छन् भने चीनबाट पनि कार जीप, भ्यानलगायतका २६३ युनिट सवारी आयात भएका छन् ।
कोरियाबाट २४३, अमेरिकाबाट ४ र इन्डोनेसियाबाट ३ वटा सवारी भित्रिएको विभागको तथ्यांकमा छ । यो अवधिमा सबैभन्दा बढी १०० किलोवाट भन्दा कम रेन्जका विद्युतीय सवारी आयात भएका छन् । नेपालले १०० किलोवाट भन्दा कम रेन्जको ५ अर्ब ४० करोड रुपैयाँ बराबरको १९५९ विद्युतीय सवारी आयात गरेको तथ्यांकमा छ ।
त्यस्तै, १०० किलोवाटदेखि २०० किलोवाटसम्मका १८ करोड ९९ लाख रुपैयाँ बराबरको ४४ र २०० किलोवाटदेखि ३०० किलोवाटसम्मको ३ करोड ५१ लाख रुपैयाँ बराबरको ६ वटा सवारी भित्रिएका छन् ।
पेट्रोलियम पदार्थको मूल्यवृद्धि र आव २०७८/७९ को बजेटले विद्युतीय सवारीमा अन्तशुल्क खारेज र कर घटाएपछि बिजुली गाडीको आयात र प्रयोग बढ्दै गएको छ । आवमा गत वर्ष २०७८/७९ को यही समयअवधिमा तुलनामा पनि २०० बढी सवारी आयात भएका छन् ।
