ऊर्जा खबर
काठमाडौं । नेपाल विद्युत् प्राधिकरणले अक्सिजन उत्पादन गर्ने उद्योगहरूलाई विद्युत् आपूर्तिमा कुनै समस्या भए तुरुन्त खबर गर्न आग्रह गरेको छ । देशमा बढ्दै गएको कोरोना महामारी, थपिँदै गएका संक्रमित र अस्पतालहरूमा अक्सिजन अभाव भइरहेको सार्वजनिक भइरहेको छ । यसो हुँदा अक्सिजन उत्पादनमा समस्या नहोस् भन्दै प्राधिकरणले आग्रह गरेको हो ।
आपूर्तिमा कुनै समस्या देखिए तुरुन्त जनसम्पर्क अधिकृत वा नजिकको वितरण केन्द्र वा शाखामा खबर गर्न आग्रह गरिएको प्राधिकरणका कार्यकारी निर्देशक हितेन्द्रदेव शाक्यले बताए । ‘अक्सिजन उत्पादक उद्योगहरूमा भइरहेको आपूर्तिमा कुनै समस्या हुन दिँदैनौं,’ उनले भने, ‘वितरण केन्द्रहरूलाई पनि त्यस्ता उद्योगमा लाइन नजाने अत्यावश्यक व्यवस्था मिलाउन निर्देशन दिइएको छ ।’
याे पनि पढ्नुहाेस् : अक्सिजन उत्पादक उद्योगहरूमा विद्युत् आपूर्ति अवरोध हुन नदिन ‘हाई अलर्ट’
प्राधिकरणले गत साता नै काठमाडौं उपत्यका बाहिरका अक्सिजन उत्पादक उद्योग परिसरमा रहेका वितरण केन्द्रलाई आवश्यक व्यवस्था मिलाउन सर्कुलर गरिसकेको छ । केन्द्रहरूले आफू मातहत रहेका अक्सिजन उद्योगहरूलाई सोही अनुसार विद्युत् आपूर्तिको व्यवस्था गरेका छन् । समस्या आए खबर गर्न उद्योगहरूलाई परिपत्रसमेत गरेको जनाइएको छ ।
.jpg)
