ऊर्जा खबर
काठमाडौं । लगानी बोर्ड नेपाल (आइबीएन) ले काठमाडौं उपत्यकाको चक्रपथमा विद्युतीय बस सञ्चालनको सम्भाव्यता अध्ययनका लागि अन्तर्राट्रिय बोलपत्र आह्वान गरेको छ । बोर्डले आइतबार सूचना जारी गर्दै (इबीआरटी) र्यापिड ट्रान्जिट बस सञ्चालनका लागि बोलपत्र आह्वान गरेको हो ।
बस सञ्चालन, व्यवस्थापन र विकासका लागि सम्भाव्यता अध्ययन गर्न बोलपत्र आह्वान गरिएको बोर्डले जनाएको छ । बोर्डका अनुसार इच्छुक कम्पनीले आगामी मंसिर १२ गतेसम्म आवेदन दिन सक्नेछन् ।
अध्ययनका लागि छनोट भएको कम्पनीले सम्झौता भएको १८ महिनाभित्र चक्रपथ र्यापिड ट्रान्जिट बस सञ्चालनको विषयमा अध्ययन सम्पन्न गर्नुपर्नेछ ।
विद्युतीय बस सञ्चालनपछि सार्वजनिक सवारी साधनको सेवा स्तरोन्नति,यात्रा अवधि घटाउने, सडक सुरक्षा, सार्वजनिक सवारी साधनको सहज उपलब्धता, विश्वसनीयता बढ्ने विश्वास लिइएको छ ।
विद्युतीय बस सञ्चालनका लागि चक्रपथ सडकको लेन छ्ट्याउने योजना छ । अध्याधुनिक बस स्टप र टर्मिनल र स्मार्ट टिकेटिङ हुनेछ । चक्रपथमा विद्युतीय सवारी सञ्चालनको सम्भाव्यता अध्ययन बुट (बीओओटी) मोडलमा पूर्वाधारन निर्माण गर्न १५ करोड ३० लाख अमेरिकी डलर अनुमान गरिएको छ ।
