ऊर्जा खबर
काठमाडौं । ५७.३ मेगावाटको म्याग्दी खोला जलविद्युत आयोजनामा नेपाल बैंक लिमिटेडको अगुवाईमा ५ बैंकले ऋण लगानी गर्ने भएका छन् । म्याग्दीमा हाइड्रो भिलेज प्रालिले निर्माण गर्न लागेको आयोजनामा नेपाल बैंकको अगुवाईमा मेगा बैंक, कृषि विकास बैंक, नेपाल एसबिआइ बैंक र कर्मचारी सञ्चय कोषले लगानी गर्ने भएका हुन् ।
आयोजनाको प्रवर्द्धक र ऋण लगानी बैंकहरूबीच सोमबार (कात्तिक २१ गते) सम्झौता भएको छ । सम्झौता अनुसार आयोजनामा बैंकहरुले गर्न लागेको लगानी कूल लागतको ७० प्रतिशत हो । बाँकी ३० प्रतिशत स्वपूँजी लगानी रहनेछ ।
आयोजना सम्पन्न गर्न १० अर्ब ७४ करोड रुपैयाँ लागत अनुमान गरिएको छ । आयोजनाको काम २०८२ चैतमा सम्पन्न गर्ने लक्ष्य राखिएको छ । आयोजना निर्माण गर्न धेरै चुनौति हुने भएपनि जस्तोसुकै प्रतिकुल परिस्थितिमा पनि तोकिएको समयमै पूरा गर्ने हाइड्रो भिलेज अध्यक्ष रामेश्वर थापा थापाले बताए ।
अहिले आयोजनालाई जाड्ने २४ किलोमिटर लामो पहुँच मार्ग निर्माणको तयारी भइरहेको कम्पनीले जनाएको छ । धौलागिरि गाउँपालिकाको दोभानमा आयोजनाको बाँध निर्माण हुनेछ । बगर भन्ने स्थानमा विद्युतगृह निर्माण हुनेछ । आयोजना पूरा भएपछि सुख्खायाममा १०३.११ गिगावाट र वर्षामा २३२.८८ गिगावाट घन्टा गरी वार्षिक ३३४ गिगावाट घन्टा विद्युत उत्पादन हुनेछ ।
आयोजनाबाट उत्पादन हुने विद्युत नेपाल विद्युत प्राधिकरणको बनखेत सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनी आफैले निर्माण गर्नेछ ।
