ऊर्जा खबर
काठमाडौं । नेपाल विद्युत् प्राधिकरण कञ्चनपुर वितरण केन्द्रले समयमा विद्युत् महसुल नतिर्ने ३४ ग्राहकको लाइन काटेको छ । केन्द्रले बारम्बार ताकेता गर्दा पनि महसुल नबुझाउने ग्राहकको लाइन बुधबार काटेको हो ।
लाइन काटिएका ग्राहकले ७ लाख १६ हजार ६२२ रुपैयाँ बक्यौता महसुल बुझाउन बाँकी थियो । लाइन काटी झन्डै ४ लाख रुपैयाँ महसुल असुल गरिएको केन्द्र प्रमुख अरुणकुमार साहले बताए । तिहारपछि बक्यौता असुलीलाई अझै सशक्त बनाइने पनि उनले जानकारी दिए ।
असुलउपर गर्नुपर्ने विद्युत् महसुल बक्यौता वृद्धि हुँदै गएपछि केन्द्रहरूले महसुल नतिर्ने ग्राहकको लाइन काटिरहेका छन् । विद्युत महसुल संकलन विनियमावली २०७८ बमोजिम मिटर रिडिङ भएको १६औँ दिनदेखि थप दस्तुर आकर्षित हुने व्यवस्था छ । मिटर रिडिङ भएको मितिले १६औँ दिनदेखि ३०औँ दिनसम्म पाँच प्रतिशतका दरले र ३१औँ दिनदेखि ४०औँ दिनसम्म १० प्रतिशतका दरले थप दस्तुर लाग्ने प्रावधान छ ।
मिटर रिडिङ भएको मितिले ४०औँ दिनसम्म पनि विद्युत् महसुल नबुझाउने उपभोक्तालाई ४१औँ दिनदेखि बिलको २५ प्रतिशतका दरले थप दस्तुर लाग्ने व्यवस्था छ । यसरी २५ प्रतिशतका दरले थप दस्तुर लागेको ६०औँ दिनसम्म पनि बक्यौता महसुल नबुझाएमा लाइन काट्ने व्यवस्था छ । लाइन काटेको ६ महिनासम्म पनि बक्यौता महसुल नबुझाउने उपभोक्तालाई कालोसूचीमा राखी असुली प्रक्रिया अगाडि बढाउने प्रावधान छ ।
विनियमावलीको यही प्रावधानको आधारमा मिटर रिडिङ भएको मितिले ६०औँ दिनसम्म पनि बक्यौता विद्युत् महसुल भुक्तान नगर्ने उपभोक्ताको चरणबद्धरूपमा विद्युत् लाइन काटी बक्यौता महसुल असुलउपर गर्ने रणनीति लिइएको केन्द्रका इन्जिनियर जुही झाले बताए ।
.jpg){kind=spacer}