ऊर्जा खबर
काठमाडौं । यस वर्षको वर्षायाममा १५ अर्ब २४ करोड रुपैयाँको विद्युत् भारततर्फ निर्यात गरिएको छ । नेपाल विद्युत् प्राधिकरणले देशभित्र खपत गरी बाँकी भएको वर्षायामको विद्युत् गत जेठ २८ गतेबाट भारतीय बजारमा बिक्री सुरु गरेको थियो ।
प्राधिकरणले २०८० जेठदेखि मंसिर २० गतेसम्मकाे अवधिमा १ अर्ब ७३ करोड ७१ लाख युनिट विद्युत् निर्यात गरी १५ अर्ब २३ करोड ८० लाख रुपैयाँ आर्जन गरेको छ । प्राधिकरणले यसअवधिमा दैनिक अधिकतम ७०० मेगावाटसम्म विद्युत् निर्यात गरेको थियो । निर्यात गरिएको विद्युत्काे औसत बिक्री दर प्रतियुनिट ८.७७ रुपैयाँ रहेको छ ।
यसैगरी, चालु आर्थिक वर्ष २०८०/८१ को साउनदेखि मंसिर २० गतेसम्ममा १३ अर्ब २३ करोड ६७ लाख रुपैयाँको विद्युत् निर्यात गरिएको छ । यसअवधिमा १ अर्ब ४७ करोड ६७ लाख युनिट विद्युत् निर्यात भएको छ । निर्यात गरिएको विद्युत्काे औसत बिक्री दर प्रतियुनिट ८.९६ रुपैयाँ रहेको छ ।
प्राधिकरणका अनुसार सुख्खायाम सुरु भएसँगै खोला तथा नदीहरूमा पानीको बहाव घटी देशभित्रका जलविद्युत् गृहबाट उत्पादन घट्न सुरु भएको छ । जाडोसँगै आन्तरिक माग बढेपछि त्यसलाई पूर्ति गर्न भारतीय बजारबाट विद्युत् आयात सुरु भएको छ । शुक्रबार रातिबाट विद्युत् निर्यात पूर्ण रूपमा बन्द हुनेछ ।
प्राधिकरणका कार्यकारी निर्देशक कुलमान घिसिङले अहिले दैनिक रुपमा विद्युत्काे अधिकतम माग १७०० मेगावाटको हाराहारी रहेको र त्यसलाई पूर्ति गर्न आन्तरिक उत्पादनले मात्र नधान्ने हुँदा थोरै परिमाणमा विद्युत् आयात सुरु गरिएको बताए ।
‘अहिले विद्युत् उत्पादन र माग करिब–करिब बराबरी छ, अर्धजलाशययुक्त विद्युत् गृहहरूमा दिउँसो र राति पानी जम्मा गरी साँझ र बिहानको पिक सययमा चलाइरहेका छौं’, उनले भने, ‘पिक समयमा आयात गर्दा विद्युत्काे दर महँगो पर्छ भने दिउँसो र रातिको दर सस्तो पर्छ । त्यसैले देशभित्रका आंशिक जलाशययुक्त आयोजनाहरूमा दिउँसो र राति पानी जम्मा गरी उक्त समयमा आयात गर्दा सस्तो दरमा पाइने विद्युत् थोरै परिमाणमा मात्र आयात सुरु गरिएको छ ।’
उनले चैत र वैशाखमा विद्युत् आयातको परिणाम केही बढेतापनि यसवर्ष आयातभन्दा निर्यात बढी भई खुद निर्यातकर्ता बन्ने अवस्था प्रक्षेपण गरिएको बताए । ‘आगामी वैशाखको दोस्रो साताबाट विद्युत् निर्यात पुनः सुरु हुनेछ । यस वर्ष करिब ९०० मेगावाट राष्ट्रिय प्रसारण प्रणालीमा थपिँदैछ । त्यसैले अर्को वर्ष २५/३० अर्ब रुपैयाँको विद्युत् निर्यात हुने छ’, घिसिङले भने ।
दुई देशबीचको प्रसारण सञ्चाल सुधारका लागि ठूलो क्षमताका लाइनहरू बनिरहेको जानकारी दिँदै घिसिङले देशभित्र पनि जलविद्युत् आयोजनाको निर्माण भइरहेकाेले आगामी ५ वर्षभित्रमा वार्षिक करिब १ खर्ब रुपैयाँको विद्युत् निर्यात हुने अवस्था बनिरहेको बताए ।
प्राधिकरणले जेठमा २१ करोड ६० लाख, असारमा १ अर्ब ७८ करोड ५३ लाख, साउनमा २ अर्ब १४ करोड ७६ लाख र भदौमा ३ अर्ब ४७ करोड ८५ लाख रुपैयाँको विद्युत् निर्यात गरेको छ । यसैगरी, असोजमा ४ अर्ब १७ करोड ७७ लाख, कात्तिकमा २ अर्ब ६९ करोड ७० लाख र मंसिर २० गतेसम्ममा ७३ करोड ५९ लाख रुपैयाँ विद्युत् निर्यात गरी आर्जन भएको छ ।
यस वर्षको विद्युत् निर्यात अवस्था
| महिना | विद्युत निर्यात (रूपैयाँ) | प्रतियुनिट अैसत (दर रूपैयाँ) |
| जेठ | २१ करोड ६० लाख | ९.१४ |
| असार | १ अर्ब ७८ करोड ५३ लाख |
७.५४ |
| साउन | २ अर्ब १४ करोड ७६ लाख |
८.४३ |
| भदाै | ३ अर्ब ४७ करोड ८५ लाख |
११.९७ |
| असाेज | ४ अर्ब १७ करोड ७७ लाख |
१०.२० |
| कातिक | २ अर्ब ६९ करोड ७० लाख |
७.३७ |
| २० मंसिरसम्म | ७३ करोड ५९ लाख | ६.३७ |
| जम्मा | १५ अर्ब २३ करोड ८० लाख |
८.७७ |
स्राेतः नेपाल विद्युत प्राधिकरण
प्राधिकरणले देशभित्र खपत गरी बचत भएको वर्षायामको विद्युत् भारततर्फ निर्यात गर्दै आएको छ ।प्रााधिकरणले आइएक्सको डे–अहेड बजारमा प्रतिस्पर्धामार्फत र मध्यकालीन विद्युत् सम्झौताबमोजिम करिब ११० मेगावाट विद्युत् भारतीय कम्पनी एनटिपिसी विद्युत व्यापार निगम लि (एनभिभिएन)लाई बिक्री गरिरहेको थियो । एनभिभिएनले उक्त विद्युत् हरियाणा राज्यमा बिक्री गरेको थियो ।
भारतको केन्द्रीय विद्युत् प्राधिकरणले प्रतिस्पर्धी बजारमा निर्यातका लागि स्वीकृति दिइएकै ५२२ मेगावाटमध्येबाट पहिलो चरणमा करिब ४४ मेगावाट विद्युत् रियल टाइम मार्केटमा बिक्री गर्न पनि अनुमति दिएको छ । प्राधिकरणले प्रतिस्पर्धी बजारमा ५४७ मेगावाट र एनभिभिएनलाई ११० मेगावाट गरी ६५७ मेगावाट विद्युत् निर्यातका लागि स्वीकृति पाएको छ ।
