ऊर्जा खबर
काठमाडौं । कास्कीमा निर्माणाधीन ४४ मेगावाटको सुपर मादी जलविद्युत आयोजनाले अबको ११ महिनामा विद्युत उत्पादन सुरु गर्ने भएको छ । ७० प्रतिशत सम्पन्न भइसकेको आयोजना २०७८ पुसदेखि विद्युत उत्पादन सुरु गर्न लागेको हो ।
अहिले आयोजनाको बाँध, सुरुङ, विद्युतगृहलगायत सबै संरचना निर्माणको काम धमाधम भइरहेको प्रवद्र्धक सुपर मादी हाइड्रो पावर कम्पनीका अध्यक्ष पुष्पज्योति ढुंगानाले बताए । उनले निर्माण सुरु गरेको करिब २७ महिनामा आयोजनाको निर्माण अन्तिम चरणमा पुर्याएको बताए ।
बाँध क्षेत्रमा करिब ७० प्रतिशत काम सकिएको छ । आयोजनाको करिब ७.५ किलोमिटर लामो मुख्य सुरुङ ६.२५० किलोमिटर खनेर सकिएको छ । यो कूल सुरुङको ८३ प्रतिशत हो ।
विद्युतगृह पनि करिब ३० प्रतिशत सम्पन्न भइसकेको उनले जानकारी दिए । ‘सिभिल संरचनाको अब ३० प्रतिशत काम मात्रै बाँकी छ,’ उनले ऊर्जा खबरसँग भने, ‘हाइड्रो तथा इलेक्ट्रोमेकानिकलतर्फ पनि केही उपकरण आयोजना स्थलमा आउन थालिसकेका छन् । ’ उनले हाइड्रोमेकानिकलतर्फ ५० प्रतिशत काम सम्पन्न भइसकेको बताए । फलामको पाता तथा पाइपको काम भइरहेको छ ।
उनले इलेक्ट्रोमेकानिकलतर्फ पहिलो लटका उपकरण आइसकेको बताए । दोस्रो र तेस्रो लटको उपकरण आउने प्रक्रियामा छन् । आयोजना स्थलमा दैनिक ७ सय जना कामदार परिचालन गरिएको छ ।
आयोजनाबाट २०७८ असारदेखि विद्युत उत्पादन गर्ने तालिका रहे पनि कोरोना (कोभिड–१९) महामारीका कारण लक्ष्यभन्दा ६ महिना ढिलो गरी राष्ट्रिय प्रसारण प्रणालीमा जोडिने ढुंगानाले बताए । आयोजना सम्पन्न हुँदा ७ अर्ब ४७ करोड रुपैयाँ खर्च हुने अनुमान छ ।
आयोजनामा ५ अर्ब ६१ करोड रुपैयाँ विभिन्न बैंकको ऋण लगानी छ । बाँकी स्वपुँजी लगानी छ । आयोजनामा सानिमा बैंकको अगुवाईमा ७ बैंकले ऋण लगानी गरेका छन् ।
कम्पनीले आयोजनामा स्वपुँजी लगानी जुटाउन ३१ करोड ५० लाख रुपैयाँ मूल्यको ३१ लाख ५० हजार कित्ता साधारण सेयर निष्कासन गर्दैछ । कम्पनीले सेयर निष्कासनको प्रक्रियाका लागि सानिमा क्यापिटल लिमिटेडलाई बिक्री प्रबन्धक नियुक्त गरेको छ । आयोजना सम्पन्न भई उत्पादन हुने विद्युत लेखनाथ सबस्टेसनमा लगेर जोडिनेछ ।
मादी बेसिनमा सुपर मादी सहित १३ मेगावाटको मद्क्यु खोला, १२ मेगावाटको २५ मेगावाटको माथिल्लो मादी र २४ मेगावाटको माद्मे खोला आयोजना छन् । मद्क्यु खोला, नामार्जुन मादी र माथिल्लो मादी निर्माण सम्पन्न भई सञ्चालनमा आइसकेका छन् । माद्मे खोलाको निर्माण सुरु हुँदैछ ।
