गत वर्षकाे तुलनामा दिव्यश्वरी हाइड्रोको खुद नाफा २२ लाख घट्यो

काठमाडौं । संखुवासभामा ४ मेगावाटको साबा खोला जलविद्युत आयोजना निर्माण गरी सञ्चालनमा ल्याएको दिव्यश्वरी हाइड्रो पावरको खुद नाफा करिब २२ लाख घटेको छ । कम्पनीले सार्वजानिक गरेको आर्थिक वर्ष २०७९/८० को पहिलो त्रैमासको वित्तीय विवरणमा नाफा घटेको देखिएको हो । 

साउनदेखि असोजसम्मको अवधिमा ७ लाख ३८ हजार रुपैयाँ खुद नाफा कमाएको कम्पनीले जनाएको छ । कम्पनीका अनुसार गत वर्ष यही समयअवधिमा २९ लाख ३७ हजार रुपैयाँ खुद नाफा कमाएको थियो ।

यो अवधिमा कम्पनीले विद्युत बिक्रीबाट ३ करोड २१ लाख ५ हजार रुपैयाँ आम्दानी गरको छ  । गत वर्षको तुलनामा विद्युत बिक्रीबाट भएको आम्दानी बढेकाे हो । गत वर्ष कम्पनीले विद्युत विक्रीबाट २ करोड ७ लाख १ हजार रुपैयाँ मात्र आम्दानी गरेको थियो । 

यस्तै, कम्पनीले अन्य स्रोतबाट भने १० लाख रुपैयाँ आम्दानी गरेको छ । अघिल्लाे  वर्ष १० लाख नै आम्दानी गरको थियो । कम्पनीको संखुवासभामा ४ मेगावाटको सभा खोला जलविद्युत आयोजना सञ्चालनमा छन् । यो आयोजनानले २०७४ असोज ४ गतेदेखि निरन्तर विद्युत उत्पादन गरिरहेको छ ।