ऊर्जा खबर
काठमाडौं । नेपाल विद्युत प्राधिकरणले पछिल्लो दुई वर्षमा मात्र विद्युतीय पूर्वाधार निर्माण, मर्मत संभार तथा स्तरोन्नतिमा करिब ४८ अर्ब रुपैयाँ खर्च गरेको छ । प्रसारण, वितरण लाइन तथा सबस्टेसन निर्माण, मर्मत सुधार लगायतमा उक्त रकम खर्च गरेको हो ।
प्राधिकारणका कार्यकारी निर्देशक कुलमान घिसिङका अनुसार पछिल्लो दुई वर्ष अर्थात् आर्थिक वर्ष (आव) २०७८/७९ र आव २०७९/८० मा उल्लिखित लगानी भएको जानकारी दिए । ‘हरेक नागरिकको घरमा गुणस्तर र विश्वसनीय विद्युत सेवा आपूर्ति गर्न आफ्नै स्रोतबाट लगानी भएको छ,’ उनले भने, ‘हामी विद्युतीय पूर्वाधार विस्तार तथा सुधार र ग्राहकलाई नियमित गुणस्तरीय र पर्याप्त सेवा दिन अहोरात्र क्रियाशिल छौ ।’
प्राधिकरणले उपभोक्ताको गुनासोलाई सम्बोधन गर्ने प्रणालीका पूर्वाधार संरचनाहरू सुधार र सुदृढीकरण अगाडि बढाएको छ । अहिले काठमाडौं उपत्यका लगायत देशका प्रमुख ११ सहरमा सन् २०५० सम्ममा हुने विद्युतको माग प्रक्षेपण गरी चरणबद्ध रुपमा ४००, २२० र १३२ केभीको प्रसारण लाइन तथा सबस्टेसनको निर्माण अघि बढाएको घिसिङले बताए ।
अहिलेसम्म ५७४२ किलोमिटर सर्किट लाइन र ८८६७ एमभिए क्षमताको सबस्टेसन सञ्चालनमा रहेको बताउँदै घिसिङले दुई वर्षको अवधिमा २५०० एमभिएको १७ सबस्टेसन सञ्चालनमा आएको बताए । ५४ सबस्टेसन निर्माणाधीन छन् ।
प्राधिकरणले विश्वसनीय आपूर्तिका लागि सबस्टेसनको क्षमता थप गर्ने, लाइनमा ग्यापसिटर बैंक थप तथा वितरण संरचना सुधार गर्ने काम व्यापक रुपमा अगाडि बढाएको छ ।
प्राधिकरणले यो दुई वर्षको अवधिमा विपन्न परिवारलाई ४० हजार बढी मिटर निशुल्क वितरण गरेको छ । साथै, ग्राहकको गुनासो सम्बोधन गर्न हरेक प्रदेशमा कल सेन्टरको स्थापना गरी सञ्चालनमा ल्याएको छ ।
अहिले करिब ९५ प्रतिशत घरधुरीमा विद्युतको पहुँच पुगेको छ । जसमध्ये ३ वटा (मधेस, बागमती र गण्डकी) प्रदेशका सबै नागरिकमा विद्युतको पहुँच पूर्णरूपमा पुगेको छ । बाँकी, कोसी प्रदेशमा ९५, लुम्बिनी प्रदेशमा ९८, कर्णालीमा ६७ र सुदुरपश्चिम प्रदेशमा ८२ प्रतिशत मात्रै विद्युतीकरण भएको छ ।
