ऊर्जा खबर
काठमाडौं । माउन्टेन इनर्जी नेपालले ३ महिना अवधिमा करिब साढे २९ करोड रुपैयाँ खुद नाफा कमाएको छ । कम्पनीले चालु आर्थिक वर्ष २०७८/७९ को पहिलो त्रैमासिकसम्मको अवधिमा सो मुनाफा कमाएको हो ।
साउनदेखि असोजसम्ममको अवधिमा २९ करोड ३५ लाख ८ हजार रुपैयाँ खुद नाफा कमाएको कम्पनीले जनाएको छ । कम्पनीका अनुसार यो गत वर्षको यही समयअवधिको तुलनामा बढी हो । गत वर्ष ३ करोड ३१ लाख ३४ हजार रुपैयाँ खुद नाफा कमाएको थियो ।
म्याग्दीमा निर्माण सम्पन्न ४२ मेगावाटको मिस्त्री खोलाको विद्युत प्रणालीमा जोडिएसँगै खुद नाफा बढेको कम्पनीले जनाएको छ । कम्पनीका अनुसार मिस्त्री खोलाको विद्युत गत असार ३ गतेदेखि प्रणालीमा जोडिएको हो ।
यो अवधिमा कम्पनीले विद्युत ५ मेगावाटको तादी खोला र मिस्त्री खोलाको विद्युत बिक्री गरी ३८ करोड ७१ लाख ५७ हजार रुपैयाँ आम्दानी गरेको छ । जसमा मिस्त्री खोलाको विद्युत बिक्री गरी ३३ करोड ४९ लाख १० हजार रुपैयाँ र तादीको विद्युत बिक्री गरी ५ करोड २२ लाख ४७ हजार रुपैयाँ आम्दानी भएको छ ।
कम्पनीको तादी खोलाले २०६९ चैत्र १४ गतेदेखि नियमीत विद्युत उत्पादन गरिरहेको छ ।
रुरु जलविद्युतले पनि ३ करोड ३३ लाख नाफा कमायो
रुरु जलविद्युत कम्पनीले ३ महिना अवधिमा करिब ३ करोड ३३ लाख रुपैयाँ खुद नाफा कमाएको छ । कम्पनीले चालु आर्थिक वर्ष २०७८/७९ सुरु भएदेखि असोजसम्मको अवधिमा सो मुनाफा कमाएको हो ।
साउनदेखि असोजसम्म ३ करोड ३३ लाख ३५ हजार रुपैयाँ खुद नाफा कमाएको कम्पनीले जनाएको छ । कम्पनीका अनुसार यो गत वर्षको यही समय अवधिको तुलनामा करिब १५ लाख ६ हजार रुपैयाँ बढी हो । गत वर्ष ३ करोड १८ लाख २९ हजार रुपैयाँ खुद नाफा कमाएको थियो ।
यस्तै, कम्पनीले यो अवधिमा गुल्मीमा सञ्चालित ५ मेगावाटको माथिल्लो हुग्दी खोला जलविद्युत केन्द्रको विद्युत बिक्री गरी ५ करोड १५ लाख ९० हजार रुपैयाँ आम्दानी गरेको छ । गत वर्ष ५ करोड १२ लाख ४८ हजार रुपैयाँ आम्दानी गरेको थियो ।
.jpg)
