ऊर्जा खबर
काठमाडौं । नेपाल विद्युत प्राधिकरण पाँचखाल वितरण केन्द्रले मासिक ऊर्जा शुल्कभन्दा २७ प्रतिशत बढी बक्यौता असुल गरेको छ । ग्राहकले अघिल्ला महिनाको बक्यौता तिरेपछि मंसिर महिनामा बिक्री भएको विद्युतकोभन्दा बढी रकम असुल गरेको हो ।
समयमा विद्युत महसुल नतिर्ने ग्राहकको लाइन काटेर कारबाही गर्न थालेपछि धमाधम बक्यौता उठ्न थालेको वितरण केन्द्र प्रमुख मेघनाथ ढकालले बताए । उनका अनुसार ठुलो बक्यौता रकम तिर्न बाँकी हाइ हिमालयन प्लाईउडले लाइन काटिएको एक वर्षपछि करिब २६ लाख रुपैयाँ बक्यौता बुझाएको छ ।
उद्योगलाई कालो सूचीमा राख्ने तयारी गरिएको सूचना पाएपछि बाँकी बक्यौता बुझाएको हो । वितरण केन्द्रले हेर्ने भुम्लु गाउँपालिकाका ३ सय घरधुरीको लाइन काटेपछि ५ लाख रुपैयाँ बक्यौता असुल भएको छ । विद्युतको बाँकी बक्यौता तिर्ने ग्राहकको लाइन फेरि जोडिएको पनि उनले बताए ।
पलान्चोक खानेपानीको पनि लाइन काट्ने तयारी भइरहेका बेला बाँकी बक्यौता तिर्ने प्रतिवद्धता जनाएको ढकालले बताए । ‘खानेपानीले बक्यौता नतिरेको पनि धेरै समय भइसकेको थियो,’ उनले ऊर्जा खबरसँग भने, ‘लाइन काट्ने सूचना पाएपछि शुक्रबारसम्ममा तिर्छु भनेको छ ।’ शुक्रबारसम्ममा बाँकी बक्यौता नतिरे लाइन खानेपानीको लाइन पनि काटिने उनले बताए ।
केन्द्रले विशेष टोली बनाएर लाइन सुधार, ग्रााहक सेवा, बक्यौता असुली तथा चुहावट नियन्त्रण अभियानको काम गर्दै आएको छ । केन्द्रले वितरण प्रणाली सुधार गर्न ६ हजार बढी जीर्ण अवस्थाका विद्युतीय पोललाई स्टिल र सिमेन्टका पोलले प्रतिस्थापन गरेको छ ।
