हेमन्त केसी
जाजरकाेट। डिपिआर निर्माणमा ढिलाइ भएपछि नलगाड जलविद्युत् आयोजनामा खटिएको नेपाली सेनाको टोली फिर्ता हुन लागेको छ । डिपिआर निर्माणका क्रममा विस्फोटको जिम्मा सेनालाई दिइएको थियो ।
आयोजनामा सम्झौताअनुसार काम नभएको र सेनालाई दिनुपर्ने भुक्तानी पनि नदिएकाले छोड्न लागेको हो । सेनासँग दुई वर्षका लागि सम्झौता भएको थियो । सम्झौताको म्याद सकिएको छ ।
त्यस्तै, यसका लागि सेनासँग ५८ लाख रुपैयाँमा सम्झौता भएको थियो । तर, डिपिआरको जिम्मा पाएका अन्तर्राष्ट्रिय कम्पनीहरू स्मेक र एमडब्लुएच तथा स्वदेशी कम्पनी उदय कन्सलट्यान्टले सम्झौताअनुसारको भुक्तानी नगरेको सेनाले जनाएको छ । अहिलेसम्म सेनालाई १५ लाख मात्रै दिएको छ भने ४३ लाख भुक्तानी गर्न बाँकी रहेको आयोजनाले जनाएको छ ।
यस्तै, दैनिक कामबारे छलफल गर्न खोज्दा कोही पनि सम्पर्कमा नआएको सेनाले जनाएको छ । अहिले आयोजना स्थलमा खटिएको सेनालाई व्यवस्थापनको काम पनि गरेको छैन ।
नलगाड जलविद्युत् आयोजनाको डिपिआर निर्माणका लागि तेस्रोपटक म्याद थप्न प्रस्ताव गरिएको छ । डिपिआर तयारीको जिम्मा पाएको अस्ट्रेलियन कम्पनी स्मेकका प्रतिनिधि बाबुराम भारद्वाज र रेशम ढकालले डिपिआरको काम करिब ८५ प्रतिशत सकिएको र बाँकी कामका लागि समय थप्नुपर्ने माग गरेका छन् । उनीहरूले १२ सेप्टेम्बर, २०२१ सम्मको समय मागेका छन् ।
सन् २०१६ मा तीन वर्षमा डिपिआर सक्ने गरी नलगाड जलविद्युत् आयोजना र तीन कम्पनीबीच सम्झौता भएको थियो । यसअघि पनि सन् २०१९ अगस्टमा तीन महिना र त्यसपछि नौ महिना म्याद थपिएको थियो ।
नयाँ पत्रिका दैनिक
