फुकोट जलविद्युत् आयोजनाको परीक्षण सुरुङ निर्माण सुरु

वीरेन्द्रनगर । फुकोट कर्णाली अर्धजलाशययुक्त जलविद्युत् आयोजनाको परीक्षण गर्न सुरुङ निर्माण थालिएको छ । ६ वर्षभित्र आयोजना सम्पन्न गर्ने लक्ष्य राखिएको आयोजनाको ६ सय मिटर सुरुङ परीक्षणका लागि निर्माण हुनेछ । ४ सय २६ मेगावाट क्षमता रहेको आयोजनाको भौगर्भिक अध्ययनका लागि सुरुङ खनेर परीक्षण गर्न थालिएको आयोजना प्रमुख हिरामान वाइबाले बताए । 

‘माटो र चट्टानलगायतका भौगर्भिक अध्ययनका लागि सुरुङ खन्न थालिएको छ,’ उनले भने, ‘पहिलो चरणमा अध्ययन सकिएपछि भौगर्भिक अध्ययनका लागि सुरुङ खनिएको हो ।’ आयोजना निर्माणको अहिले परीक्षण सुरुङ खन्ने र आवासका लागि घर निर्माणका काम थालनी भएको आयोजना प्रमुख वाइबाले बताए । ‘चाँडै आवासको निर्माणको काम सुरु हुँदै  छ,’ उनले भने, ‘यही गतिमा काम अगाडि बढे लक्ष्यमा पूरा हुन्छ ।’ आयोजना प्रभावित क्षेत्रका स्थानीयवासीको जग्गा अधिग्रहणको प्रक्रिया सकिएको आयोजनाले जनाएको छ । 

जलविद्युत् आयोजनाको बाँध निर्माणबाट डुबानमा पर्ने कालिकोटको सान्नी त्रिवेणी गाउँपालिका, रास्कोट नगरपालिका र पचालझरना गाउँपालिकाको साबिक रकु, स्युँना, मेहलमुढी, फुकोट, बदालकोट, नानीकोट र राम्नाकोट गाविसमा रहेका प्रभावितको जग्गा अधिग्रहणको प्रक्रिया सकिएको जिल्ला प्रशासन कार्यालय कालिकोटले जनाएको छ ।

आयोजना निर्माणका लागि १ हजार १ सय ४९ परिवार प्रभावित भएका छन् । आयोजनास्थलमा पूरै जग्गा परेका जग्गाधनीले ७५ प्रतिशत र आंशिक जग्गा परेकाले ६६ प्रतिशत मुआब्जा पाउने आयोजना प्रमुख वाइबाले बताए । आयोजनाका लागि करिब १ खर्ब बजेट आवश्यक पर्ने आयोजनाले जनाएको छ ।

नयाँ पत्रिका दैनिक