३२ करोडले घट्यो खानी खोला हाइड्रोको खुद नाफा 

काठमाडौं ।  २ आयाेजनाबाट  ६.३६ मेगावाट विद्युत उत्पादन गरी राष्ट्रिय प्रसारण लाइनमा जाेडेकाे खानी खोला हाइड्रो पावर कम्पनी लिमिटेडको खुद नाफा साढे ३२ करोड रुपैयाँले घटेको छ । कम्पनीले सार्वजानिक गरेको वित्तीय विवरण अनुसार अघिल्लो आव २०७७/७८ को तुलनामा  गत आवमा नाफा घटेको देखिएको हो । 

यो अवधिमा कम्पनीको ३२ करोड ५२ लाख ५८ हजार ३ सय ८५ रुपैयाँले नाफा घटेर ६३ लाख ६४ हजार ७ सय ९९ रुपैयाँ पुगेको छ । अघिल्लो आवमा ३३ करोड १६ लाख २३ हजार १ सय ८४ रुपैयाँ खुद नाफा कमाएको थियो । 

कम्पनीको खुद नाफा घटेसँगै विद्युत बिक्रीबाट हुने आम्दानी पनि घटेको छ । यो अवधिमा विद्युत बिक्री गरी १५ करोड ६५ लाख ८४ हजार ३ सय ७१ रुपैयाँ आम्दानी गरेको छ भने अघिल्लो आवमा ५१ करोड २ लाख ७१ हजार ५ सय ६४ रुपैयाँ आम्दानी गरेको थियो ।

यस्तै, कम्पनीले अन्य स्रोतबाट ६ लाख रुपैयाँ आम्दानी गरेको छ । कम्पनीले ललितपुरकाे टुङ्गुन खोलामा ४.३६ मेगावाटको टुङ्गुन–ठोस्ने खोला जलविद्युत आयोजना र  साेही जिल्लामा २ मेगावाटको खानी खोला जलविद्युत आयोजना निर्माण गरी  विद्युत उत्पादन गरिरहेको छ ।