ऊर्जा खबर
काठमाडौं । उद्योग धन्दा, कलकारखाना, व्यापार व्यावसाय सबै खुलेपछि विद्युत खपत दर पुरानै लयमा फर्किएको छ । निशेधाज्ञा हटेर आर्थिक गतिविधि बढ्दै गएकाले विद्युत खपत परिमाण पनि पहिलेकै अवस्थामा पुगेको हो ।
नेपाल विद्युत प्राधिकरणको पछिल्लो एक साताको तथ्यांक हेर्ने हो भने विद्युतको उच्च माग क्रमशः उकालो लागेको छ । गत शनिबार १३ सय ८५ मेगावाट रहेको विद्युतको उच्च माग मंगलबार (हिजो) सम्म आइपुग्दा बढेर १४३० मेगावाट पुगेको छ ।
४ दिनको अवधिमा ४५ मेगावाट माग बढेको प्राधिकरण भार प्रेषण केन्द्रले जनाएको छ । भार प्रेषण केन्द्रका अनुसार मंगलबारको उच्च माग आन्तरिक उत्पादन र भारतबाट आयातित विद्युतबाट व्यवस्थापन गरिएको छ ।
आन्तरिक उत्पादन ९३० मेगावाट छ । मंगलबारको माग व्यवस्थापन गर्न भारतबाट ५०० मेगावाट विद्युत आयात भएको छ । हिउँदमा करिब ८५० मेगावाटसम्म विद्युत आयात भएकोमा बर्खामा उच्च माग भएका बेला ५०० मेगावाट विद्युत आयात गरी माग व्यवस्थापन गरिएको प्राधिकरणले जनाएको छ ।
निजी क्षेत्रका विद्युत आयोजनाले ५२० मेगावाट उत्पादन गरेका छन् । प्राधिकरणका आयोजनाको उत्पादन ४१० मेगावाट छ । अहिले प्राधिकरणले सञ्चालन गरेको ७० मेगावाटको मध्यमर्स्र्याङदीको उत्पादन बन्द छ । विद्युत प्रवाह हुने प्रसारण लाइनको टावर बाढीले बगाएपछि एक सातादेखि जलविदुतगृहको उत्पादन बन्द छ ।
मध्यमरस्र्याङ्दीको उत्पादन बन्द हुँदा कुलेखानी जलाशय २४ घन्टा चलाइएको छ । गत बैशाख १६ गतेपछि निशेधाज्ञा अवधिमा विद्युतको उच्च माग १ हजारदेखि १२ सय मेगावाट हाराहारीमा थियो । सबैभन्दा कम ९ सय मेगावाटमा झरेको थियो ।
प्राधिकरणले यो वर्ष बर्खामा विद्युतको उच्च माग १५ सय मेगावाट माथि जाने प्रक्षेपण गरी सोही अनुसार आपूर्ति व्यवस्थापन मिलाउने तयारी गरेको थियो । तराईमा गर्मी बढ्ने हो भने विद्युत खपत परिमाण अझै बढ्ने पनि प्राधिकरण भारत प्रेषण केन्द्रले जनाएको छ ।
