ऊर्जा खबर
काठमाडौं । जगदुल्ला हाइड्रो पावर कम्पनी लिमिटेडको प्रमुख कार्यकारी अधिकृत (सिइओ) मा सञ्जय सापकोटा नियुक्त भएका छन् । शनिबार (बैशाख २ गते) को प्रस्तुतीकरण र अन्तर्वार्तापछि उनलाई आइतबार बसेको सञ्चालक समितिको १०२औं बैंठकले सिइओ बनाउने निर्णय गरेको हो ।
कम्पनीको नियमावली २०७४ को नियम ३६ बमोजिम सापकाेटालाई सिइओको पदमा ४ वर्षका लागि नियुक्त गर्ने निर्णय भएको कम्पनीले जनाएको छ । कम्पनीले फागुन १४ गते निकालेको विज्ञापनमा ५ जनाले आवेदन दिएका थिए । आवेदकमध्ये ४ जना सर्टलिष्ट (प्रारम्भिक छनोट) मा परेका थिए । प्रारम्भिक छनोटमा सापकोटा सँगै सूर्यप्रकाश पाण्डेय, नरेन्द्रसिंह भण्डारी र बखतबहादुर शाही थिए ।
सर्टलिष्टमा परेका तीनजनालाई पछि पार्दै सापकोटा प्रमुख कार्यकारी अधिकृतमा नियुक्त भएको कम्पनीले जनाएको छ । सापकोटा विगत लामो समयदेखि कम्पनीमा कार्यरत छन् ।
सापकोटा अहिले सोही कम्पनीले अघि बढाएको १०६ मेगावाटको जलदुल्ला जलविद्युत आयोजना प्रमुखका रुपमा कार्यरत छन् । उनले यसअघि निमित्त प्रमुख कार्यकारी अधिकृतको जिम्मेवारी समेत सम्हालिसकेका छन् ।
