पाँच वर्षभित्र ६३ मेगावाटको छुजुङ्ग खोलाबाट व्यवसायिक विद्युत उत्पादन हुने

काठमाडौं । सांग्रिला ऊर्जा प्रालिले निर्माण गर्न लागेको ६३ मेगावाटको छुजुङ्ग खोला जलविद्युत आयोजनाकाे काम आगामी पाँच वर्षभित्र सम्पन्न गर्ने गरी प्रस्ताव गरिएको छ । कम्पनीले आयोजनाको सिभिल संरचना, उपकरण जडान तथा परीक्षणको २०८४ मंसिरभित्र सम्पन्न गर्ने गरी निर्माण अनुमतिका लागि विद्युत विकास विभागमा आवेदन दिएको हो ।

प्रदेश नम्बर १ अन्तर्गत संखुवासभा जिल्लाको भोटेखोला गाउँपालिका भएर बग्ने छुजुङ्ग खाेला र छुमछाम खोल्सी समेतको पानी उपयोग गरी आयोजना निर्माण गर्न लागेको कम्पनीले जनाएको छ । कम्पनीका अनुसार अनुमतिपत्र जारी गर्न विभागले यसबाट पर्ने असरका विषयमा सरोकारवालासँग राय/सुझाव मागिएको छ । विभागले ३५ दिने सूचना जारी गर्दै उक्त अवधिभित्र सुझाव दिन माग गरेको छ । 

नदीको बहावमा आधारित (पिकिङ रन अफ रिभर) प्रकारको आयोजनाको वहाव डिजाइन ८.४१ घनमिटर प्रतिसेकेन्ड र कुल हेड ९३८ मिटर हुनेछ । यो आयोजनfबाट वार्षिक सरदर ३७१.८४८ गिगावाट घण्टा विद्युत उत्पादन हुने अध्ययनले देखाएको छ । 

आयोजनाको मुख्य संरचनाहरू खोलाको दायाँ किनारमा पर्दछ । छुजुङ्ग खोलामा बाँध बाधी खोलाको दायाँपट्टी निर्माण हुने इन्टेक पाइपबाट पानी फकाई सो पानीलाई आयोजनाको मुख्य संरचनाहरू हुँदै विद्युत गृहमा लगिनेछ र तत् पश्चात् टेलरेस टनेल मार्फत पानीलाई सोही खोलामा पठाइनेछ ।

उत्पादित ऊर्जालाई ११/१२० केभीको ५५ किलोमिटर लामो लम्बाईमा रहेको नेपाल विद्युत प्राधिकरणको प्रस्तावित शीतलपाटी सबस्टेसनमा जोडी राष्ट्रिय प्रसारण प्रणालीमा समाहित गरिनेछ ।

यो आयोजना निर्माण तथा सञ्चालन गर्दा भू–क्षय, वायु प्रदुषण आदिद्वारा वातावरणमा उल्लेखनीय असर नपर्ने गरी निर्माण गरिने कम्पनीले जनाएको छ ।