ऊर्जा खबर
काठमाडौं । माण्डु हाइड्रो पावर लिमिटेडले भदौ १० गतेदेखि प्रिमियम सहित साधारण सेयर निष्कासन गर्ने भएको छ । कम्पनीले सर्वसाधारणका लागि छुट्याएको १२ लाख कित्ता सेयर निष्कासन गर्ने तयारी गरेको हो ।
कम्पनीले पहिलो चरणमा प्रभावित स्थानीय र वैदेशिक रोजगारीमा गएका नेपाली नागरीकहरूका लागि सेयर निष्कासन तथा बाँडफाँड गरी दोस्रो चरणमा सर्वसाधारणका लागि छुट्याएको १२ लाख ५ हजार ३ सय २० कित्ता सेयर निष्कासन गर्ने तयारी गरेको कम्पनीले जनाएको छ । कम्पनीले सय रुपैयाँ अंकितमा प्रिमियम रकम १०६ रुपैयाँ थप गरी २०६ का दरले सेयर निष्कासन गर्ने तयारी गरेको हो ।
सर्वसाधारणले न्यूनतम १० कित्तादेखि अधिकतम ५० हजार कित्ता सम्म आवेदन दिन पाउनेछन् । सर्वसाधारणले छिटोमा भदौ १३ गतेसम्म र ढिलोमा भदौ २४ गतेसम्म आवेदन दिन सक्नेछन् ।
कम्पनीको सेयर निष्कासन गरी बाँडफाँड गर्न प्रभु क्यापिटल लिमिटेडलाई बिक्री प्रबन्धक तोकिएको छ । कम्पनीले २२ मेगावाको बागमती साना जलविद्युत आयोजना सञ्चालन गरिरहेको छ । सञ्चालनमा रहेको आयोजनाको कुल लागत ४ अर्ब १ करोड ९४ लाख ३७ हजार २ सय ५८ रुपैयाँ रहेको छ ।
