ऊर्जा खबर
काठमाडौं । नेपाल विद्युत प्राधिकरणमा कार्यरत मिटर रिडर संघर्ष समितिले गोटा गन्ति मिटरलाई प्राधिकरणको ज्यालादारी कर्मचारी नबनाएसम्म विरोधका कार्यक्रम जारी राख्ने बताएका छन् । मिटर रिडरलाई गोटा ठेक्काका मान्छे हुन भन्दै अपमानपूर्ण व्यवहार भएको भन्दै विरोधका कार्यक्रम सुरु गरेको थियो ।
मिटर रिडरहरूलाई प्राधिकरणको ज्यालादारी सरह ६२३ जनालाई एकै प्रकारको ज्यालादारी कर्मचारी बनाउन माग गर्दै गत जेठ २३ गते केन्द्रिय कार्यालयालाई ध्यानाकार्षण पत्र बुझाएको थियो । समितिले लामो समयदेखि प्राधिकरणले मिटर माथि विभेद गर्दै सेवा सुविधाबाट बञ्चित गरेको आरोप लगाएको थियो ।
समितिले यसअघि पनि विभिन्न समयमा मागका सम्बन्धमा ध्यानाकर्षण गराउँदै आएको थियो । २०७५ को विनियमावली ४ पटकसम्म संशोधन हुँदा पनि हाम्रो सेवा सुविधामा ज्यालादारी सरह हुन पर्नेमा विभेदपूर्ण शिर्षक खडा गरी कर्मचारीको मनोबलमा तिक्तता आउने प्रति समितिको ध्यानाकर्षण भएको छ ।
श्रमको ग्यारेन्टीको लागि समान ज्याला र श्रमिकको पहिचानको लागि पूर्ण कदको पहिचान सहितको प्राधिकरणको श्रमिक ज्यालादारी बनाउन समितिले जोडदार माग गरेको छ ।
लामो समयदेखि कार्यरत रहेर प्राधिकरणको हरेक कामकाजमा उत्साहपूर्ण र सक्रियरूपमा सहभागी भए पनि मिटर रिडरलाई वेवास्ता गर्दै आएको समितिको आरोप छ । विगत १५ वर्षदेखि प्राधिकरणमा कार्य गर्दै आए पनि प्राविधिकरूपमा पाउनुपर्ने सेवा सुविधाबाट बञ्चित गरेको समितिको ध्यानाकर्षण पत्रमा उल्लेख छ । पत्रमा प्राधिकरणमा गरेको योगदान र श्रमको खिल्ली उडाइएको, कुनै मुल्याङ्कन समेत नभएको समेत उल्लेख छ ।
