ऊर्जा खबर
काठमाडाैं । लगानी बाेर्ड नेपालले अहिलेसम्म विविन्न ३३ परियाेजनाका लागि १० खर्ब ४० अर्ब रुपैयाँ बराबरकाे लगानी स्वीकृति गरेकाे छ । सार्वजनिक-निजी साझेदारी (पिपिपी) सँग सम्बन्धित विश्व सञ्जाल युनिट (डब्लूएपिपिपी) प्रधानमन्त्री शेरबहादुर देउवासँग असार ५ गते गरेकाे भेटका क्रममा उक्त जानकारी गराइएकाे हाे ।
डब्लूएपिपिपीका अध्यक्ष जियाद अलेक्जेन्डर हायेक सहित तीन जनाको प्रतिनिधिमण्डलसँगकाे भेटमा देउवाले नेपालमा पिपिपी अन्तर्गत स्वच्छ र नवीकरणीय ऊर्जा, दिगो एवं उत्थानशील पर्यटकीय एवं स्वास्थ्य, शिक्षा, सूचना–प्रविधि, सुरक्षित सहरी पूर्वाधार, विद्युतीय यातायात, सुरुङमार्ग, सडक, औद्योगिक उत्पादन, कृषि प्रशोधन लगायत विविध क्षेत्रमा लगानीको सम्भाव्यता रहेको बताए । साथै, पिपिपी परियोजनालाई लगानी सम्भाव्य बनाउन डब्लूएपिपिपीको विज्ञताको लाभ लिन नेपाल इच्छुक रहेको उनकाे भनाइ थियो ।
साेही क्रममा लगानी स्वीकृतिकाे दायरालाई फराकिलाे बनाउँदै अागामी सन् २०२५/२६ सम्म १० अर्ब अमेरिकी डलर लगानी स्वीकृति गर्ने लक्ष्य रहेकाे बाेर्डका प्रमुख कार्यकारी अधिकृत सुशील भट्टले जानकारी दिएका थिए । पिपिपी मार्फत् पूर्वाधार तथा अन्य व्यावसायिक सम्भाव्यता भएका परियोजनाहरू कार्यान्वयन गरी सरकारको सेवा प्रवाहलाई अझै चुस्त र गुणस्तरीय बनाउन सकिने भन्दै यसले स्वदेशी एवं प्रत्यक्ष वैदेशिक लगानी (एफडीआई) आकर्षित गरी दिगो र समावेशी आर्थिक विस्तारको आधार तयार हुनेमा छलफल भएकाे थियाे ।
