ऊर्जा खबर
काठमाडौं । २.६४५ मेगावाटको भदौली जलविद्युत आयोजना निर्माण हुने भएको छ । कास्कीको माछापुच्छ्रे गाउँपालिका भइ बग्ने भदौली खोलामा पहिचान भएको आयोजना भदौली खोला हाइड्रोपावर प्रालिले अघि बढाउन लागेको हो ।
अध्ययन पूरा भएको आयोजनाको उत्पादन अनुमतिपत्र लिने प्रक्रिया अन्तिम चरणमा पुगेको छ । विद्युत विकास विभागले कम्पनीलाई उत्पादन अनुमतिपत्र दिन ३५ दिने सूचना जारी गरेको छ ।
विभागका अनुसार वन तथा वातावरण मन्त्रालयबाट स्वीकृत वातावरणीय प्रभाव मूल्याङकन प्रतिवेदन र आयोजनाको अध्यययन रिपोर्टका आधारमा प्रवद्र्धक कम्पनीलाई उत्पादन अनुमतिपत्र दिने तयारी भइरहेको छ ।
विभागले अनुमतिपत्र जारी गर्नुअघि आयोजना निर्माण तथा सञ्चालन गर्दा पर्न सक्ने प्रतिकुल असरका बारेमा सम्बन्धित सरोकारवालासँग राय/सुझाव मागेको छ । विभागले सूचना जारी भएको मितिले ३५ दिनभित्र प्राप्त हुने गरी राय/सुझाव पठाउन सरोकारवालसँग समक्ष आग्रह गरेको छ ।
विभाग वा प्रवद्र्वक कम्पनीको कार्यालयमा प्राप्त हुने गरी राय/सुझाव पठाउन सरोकारवाला समक्ष आग्रह गरिएको छ । आयोजनाको सम्पूर्ण संरचना भदौली खोलाको दायाँ किनारामा रहने गरी डिजाइन तयार पारिएको कम्पनीले जनाएको छ ।
आयोजनाको डाईभर्जन नहर तथा विद्युतगृह दुवै संरचना माछापुच्छ्रे गाउँपालिकाको वडा नम्बर १ मा पर्दछ । खोलामा बाँध बाधी १ हजार २७ मिटर लामो पेनस्टक पाइपमार्फत विद्युत गृहमा पुर्याइनेछ ।
विद्युतगृहमा दुई वटा टर्वाइन जडान हुनेछ । टवाईनमा जडान भएको ३ फेजको दुई वटा जेनेरेटरमार्फत विद्युत उत्पादन हुनेछ । आयोजनाको सबै काम पूरा गरी २०८० साउन १६ गतेदेखि विद्युत उत्पादन सुरु गर्ने कम्पनीले जनाएको छ ।
उत्पादन भएको विद्युत करिब १२ किलोमिटर दुरीमा रहेको नेपाल विद्युत प्राधिकरणको लाहाचोक सबस्टेसनमा जोडिनेछ ।
