विद्युत आपूर्ति : प्राधिकरण :५५८० मे.वा.घन्टा / निजी क्षेत्र :४४३३ मे.वा.घन्टा / आयात : १७८१९ मे.वा.घन्टा / ट्रिपिङ :५० मे.वा.घन्टा / ऊर्जा माग :२७८८२ मे.वा.घन्टा/ उच्च माग :१४३६ मेगावाट
×

१९ मेगावाट खेर जाँदा हिमालय ऊर्जाको मासिक ६ करोड बढी आम्दानी गुम्दै

२०७७ फाल्गुण १४

काठमाडौं । प्रसारण लाइन समस्याले हिमालयन ऊर्जा विकास कम्पनीको मासिक ६ कराेड ४९ लाख रुपैयाँ बढी आम्दानी गुमिरहेकाे छ । कम्पनीले रामेछापमा निर्माण गरेका २ आयोजनाको १९ मेगावाट विद्युत राष्ट्रिय प्रसारण प्रणालीमा जोडिन नसक्दा विद्युत बिक्रीबाट हुने आम्दानी गुमिरहेको हो ।

१२ मेगावाटको उपल्लो खिम्ती र ७ मेगावाटको माथिल्लो खिम्ती निर्माण सम्पन्न भई विद्युत उत्पादनको चरणमा पुगिसकेका छन् । दुवै आयोजनाको उपकरण तथा संरचना परीक्षण भइसकेको छ ।

विद्युत प्रवाह हुने १३२ केभी खिम्ती–गर्जाङ प्रसारण लाइन पूरा भइनसकेकाले उत्पादन सुरु गर्न नपाएको आयोजना व्यवस्थापक सरोजकुमार उपाध्यायले बताए । ‘नेपाल विद्युत प्राधिकरणले समयमा प्रसारण लाइन बनाइदिएन,’ उनले ऊर्जा खबरसँग भने, ‘आयोजना सम्पन्न गरेर चुप लागेर बस्नु परेको छ । आम्दानी खोलामा बगेको बग्यै छ ।’

उनले उपल्लो खिम्तीको विद्युत खेर जाँदा मासिक साढे ३ करोड रुपैयाँ आम्दानी गुमिरहेको बताए । माथिल्लो खिम्तीको पनि मासिक २ करोड ८३ लाख रुपैयाँ बराबरको आम्दानी गुमिरहेको छ ।

विद्युत प्रसारण प्रणालीमा जोडिने हो भने कम्पनीले विद्युत बिक्रीबाट उपल्लो र माथिल्लो खिम्तीले वार्षिक ७८ करोड रुपैयाँ आम्दानी गर्न सक्छन् । जसमा उपल्लो खिम्तीले ४४ करोड र माथिल्लो खिम्तीले ३४ करोड रुपैयाँ आम्दानी गर्न सक्छ ।

उनले प्राधिकरणले अबको ३ महिनामा प्रसारण लाइन तयार गर्ने प्रतिबद्धता जनाए पनि सबस्टेसनको धेरै काम बाँकी रहेकाले सम्भवन नहुने दाबी गरे । प्राधिकरणले तोकेको ३ महिनामा प्रसारण लाइन र सबस्टेसनको निर्माण पूरा भए पनि यो अवधिमा कम्पनीको २७ करोड आम्दानी गुमिसक्ने पनि उपाध्यायले बताए । 

दुई आयोजना सम्पन्न गर्न करिब ३ अर्ब १५ करोड रुपैयाँ खर्च भएको छ । उपल्लो र माथिल्लो खिम्ती जस्तै समयमा प्रसारण लाइन नबन्दा २५ मेगावाटको सिंगटी, २३.५ मेगावाटको सोलु १० मेगावाटको सिप्रिङ खोलालगायत आयोजनाको विद्युत पनि खेर गइरहेको छ । 

प्रसारण लाइन समयमा पूरा नभएकै कारण निर्माणाधीन दर्जनौ जलविद्युत आयोजनाले पटक–पटक उत्पादन म्याद थप गर्दै आएका छन् । सरकारले विद्युत प्रवाहलाई सहज बनाउन प्रसारण लाइन निर्माणलाई प्राथमिकतामा राखेपनि काम भने सुस्त छ ।

प्रतिक्रिया