ऊर्जा खबर
काठमाडौँ । ४२ मेगावाटको मोदी ए क्यास्केड आयोजनाको ‘लट १’ को ठेक्का चिनियाँ कम्पनी सिचुआन सुइटान कन्स्ट्रक्सन कम्पनी र नेपालको हाइ हिमालय कम्पनीको संयुक्त उपक्रम (जेभी) कम्पनीले पाएको छ । अप्पर मोदी क्यास्केड अन्तर्गतका दुई आयोजना मध्ये पहिलो आयोजनाको ठेक्का लागेको हो ।
कम्पनीलाई उक्त आयोजनाको निर्माण प्याकेज मध्ये लट–१ अन्तर्गत्को सिभिल र मेकानिकाल निर्माणको ठेक्का २ अर्ब ४ करोड रुपैयाँमा दिइएको हो ।
अप्पर मोदी–ए ४२ मेगावाट र मोदी ए १८.२ (मेगावा) को विस्तृत डिजाइन २०७४ सालमा स्वीटजरल्यान्डको परामर्शदाता कम्पनी एएफ कन्सल्टले तयार पारेको थियो । त्यस मध्ये ४२ मेगावाटको आयोजना अघि बढाउन ठेक्का लागेको हो ।
कास्की र पर्वतको सीमा भएर बग्ने मोदी खोलामा निर्माण हुने आयोजना सन् १९९७ मा पत्ता लागेको थियो । यसको सम्भाव्यता अध्ययन सन् २००० मा सकिएको थियो । सन् २०१२ मा पुनः त्यसमा संशोधन गरिएको थियो ।
सुरुमा दुवै आयोजनाको हेडवर्क्स अलग–अलग निर्माण गर्ने योजना थियो । तर, अप्पर मोदी–एबाट निस्केको पानीलाई सिधै मोदी– ए मा पठाउन सकिने देखिएपछि एउटै हेर्डवक्स निर्माण गर्ने गरी नयाँ डिजाइन तयार पारिएको थियो । अब दुवै आयोजनाको काम एकसाथ अगाडि बढ्ने भएका हुन् ।
